Sfuei Mensîl Furlan Indipendent
Archivi de Patrie

Cungjò, Provincie di Udin!

............

Cungjò Provincie di Udin! O isal dome un a riviodisi? Sieradis lis Provinciis, cui che al cjale di brut voli la riforme dai ents locȃi buride fûr de zonte Serracchiani magari al spere di fȃlis resurî: ma ancje se e je vere che il gnûf governadôr Massimiliano Fedriga al à plui voltis fevelȃt di volê creȃ cjantons sul model svuizar, ogni propueste e varès di jessi fate buine no dome de Regjon, ma ancje dal Parlament. Timps luncs, duncje: soredut cun dôs Cjamaris balcanizadis come chês che a son jessudis des elezions dai 4 di Març passȃt.

Ma nus coventino pardabon lis Provinciis che ducj (ma propit ducj) cinc agns indaûr a volevin abolî e cumò ducj ur vain parsore? Ce àno fat pai nestris teritoris – o a lôr dam – par jessi stadis bot e sclop sieradis? Il belanç al è sigûr dificil di fȃ: al è clȃr che nissun al pues vê la peraule definitive, ma cuant che la croniche di ogni dì e devente storie, si scuen tamesȃ ce che lis trê provinciis furlanis a àn fat, sedi ben che mȃl, pal Friûl.

Chê di Udin, che ai prins di Avrîl e à sierȃt i siei puartons, e à davuelt ben il rûl aministratîf di viodi di stradis e scuelis, e à fat alc pe tutele de culture e de identitȃt, ma no à mai rivȃt a jessi la anime de furlanetȃt che il so ultin president Pieri Fontanini al à reclamȃt intal discors di cumiȃt. Fuarte la citazion di Pier Paolo Pasolini: «A vegnarà ben il dì che il Friûl si inecuarzarà di vei na storia, un passat, na tradision!». Pecjȃt che propit di là da la aghe, tai agns ’60, a vedin domandȃt cun fuarce di vê une lôr Provincie, ancje chê sierade di doi agns. Ancje la Cjargne e veve cirût di scjampȃ tal 2004, ma no à rivȃt a fȃlu…

Di là da la aghe, la Provincie e je coventade plui ae citȃt di Pordenon che al teritori. Il centri al à vude une legjitimazion fuarte tant che cjâf lûc, al à costruide une identitȃt socioeconomiche e une burocrazie propriis, dut cȃs simpri plui distantis di chês furlanis. In realtȃt, buine part dal teritori (soredut inte part alte de provincie) si sint furlane, ma cence dubi no par merit de Provincie. Che e à lavorȃt ben inte viabilitȃt, tal setôr ambientȃl e in chel scolastic, ma e jere un pont fer soredut pai servizis. Di fat, daspò che e je stade sierade, a son sparidis ancje la autonomie de Cjamare di Cumierç, la alternance tal control de Fondazion de Casse di Sparagn dal F-VJ e ancje la sezion falimentȃr dal Tribunȃl.

La Provincie che e à creade une minime, ma plui solide identificazion, e je stade forsit chê di Gurize, parcè che e je stade buine di meti dongje comunitȃts che a son pardabon diferentis ma che a insiorin cu la lôr diviersitȃt dut il Friûl di là dal Judri. Dai paîs furlans aes zonis a maiorance slovene, di Grau a Monfalcon, ducj al pâr che a vedin vût benefici de ativitȃt di un ent piçul, che propit par cheste sô dimension al somee che al vedi rivȃt a rispuindi in maniere eficiente aes dibisugnis de int.

Ce saraial di fȃ cumò par dâi une gnove organizazion a une Regjon che no funzione tai siei ents teritoriȃi? Viodût che lis Provinciis lis à fatis Napoleon, cuntune riforme che e vignive dal alt, sperìn che cumò cualchidun al vedi la inteligjence di fȃ partî un procès di condivision dal bas.

Dome cussì si podarà dȃi une vere rapresentance al Friûl.

di Walter Tomada

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +