EDITORIÂL – Turisim: une storie dute di contâ

Chel che o stimi il plui grant dai problemis dal turisim de nestre Regjon e je la mancjance di specificazion dal prodot Regjon, tant plui se si cjatisi tal mieç di concorints plui agressîfs: il Venit pe art, Trentin, Carinzie, Slovenie e Cravuazie pal ambient.
_Probleme presint di simpri, tant che la Regjon e je viodude plui come un miscliçot di robis
(Tex-Mex), cence une identitât clare di prodot e di propueste comerciâl.
_Fat che si riflet ancje tal alimentâr cun, par esempli, lis DOC no simpri leadis in maniere coerente al teritori; e a nivel culturâl, là che si à miôr impuartâ che espuartâ lis nestri ecelencis. O ricuardi che culture e gastronomie a apartegnin in maniere direte al turisim. Se o zontìn ancje lis micropatriis al interni (ognidun al va pes sôs), si capìs la confusion tes propuestis sedi B-to-B che B-to-C (Business-to-business, cumierç fra impresis, e Business to Customer, vendite al client, ndr).
_No bastin la vicinance a Vignesie (che al vûl dî publicizâ la concorence: miôr al sarès ‘ANCJE la vicinance a Vignesie’ che e pretint une tô identitât di prodot) o il taramot par rindi apetibile cheste tiere. La consecuence e je che, al moment, se la Regjon e cres di un pont di viste turistic al è par chescj motîfs: crisis internazionâls, crisi economiche ancje tai paîs todescs, aument dai coscj in Cravuazie (IVA al 25%) e svenditis ai paîs dal Est.
_Co lis primis si risolvaran, facil che la Regjon e tornarà in situazions di crisi. Tant si sta fasint pal fitness ma o ai la impression che si stedi confondint ce che e je la personalitât di prodot (cemût podìno rapresentâ a un turist la Regjon in cuatri peraulis? Si clame short list) cu la customer care (atenzion pal client), e intun ambit che al è pluitost contignût tal marcjât.
_Che si pensi dome al grum di invistiments tal ciclisim in zonis di estreme nicje pes dificoltâts di praticâlu su un target ampli. Duncje, la biciclete e je utile tes propuestis ma e je alc che tu zontis ae propueste principâl che no pues jessi dome il mâr che al supe la plui part dal nestri turisim, pûr rapresentant dome une piçule part dal teritori: e à di coinvolzi – tant che la Alpe Adria – plui personis pussibilis par vê risultâts economics.
_Dite chest, esistino pussibilitâts di fâ vignî fûr une identitât turistiche regjonâl? Jo o crôt di sì, e lis esperiencis sedi nestris che di altris Paîs cui stes problemis a mostrin che al è pussibil. Ma si scuen cambiâ il mût di operâ. Si scuen scomençâ a vendi emozions claris e che nus identifichin di strade.
_Chestis, secont me, lis cjatìn tes nestris storiis che a puedin proponi al marcjât une regjon che e vedi une identitât clare di prodot, in grât di competi o di colaborâ in maniere sinergjiche e no periferiche cu lis regjons dongje.
_Cualis sono? O crôt che se i resonais sù, lis cjatarês ancje voaltris. ❚
✒ Sandri Di Suald