Sfuei Mensîl Furlan Indipendent
Archivi de Patrie

EDITORIÂL – Triest citât metropolitane: lis bausiis dai partîts talians

............


✽✽ I autonomiscj furlans a àn sostignût simpri di jessi favorevui a une specifiche soluzion pal câs Triest. Une volte afermade la diversitât storiche, economiche e culturâl tra la capitâl regjonâl e dut il Friûl, di Gurize a Pordenon e duncje no dome Udin, si è sostignût simpri la dibisugne di une forme ancje istituzionâl  che e fissàs cheste realtât. Il dibatiment in chescj agns al à produsût fin cumò dome cjacaris, cence rivâ a dâ prin di dut rispueste al cuesît: Triest di une bande e il Friûl di chê altre, ma dentri de stesse regjon o sielzint une soluzion divierse di plante fûr? Intant che lis peraulis a corevin, i fats a cjapavin però une plee divierse cul grup di interès triestin simpri plui compat e trasversâl che al slargjave la sô influence su la zone di Gurize, che si presentave sul plan nazionâl tant che referent naturâl de Regjon, che cu la sô rapresentance, un pas daûr chel altri, al leve a identificâsi. La complicitât e la conivence de classe politiche furlane pal otigniment di chest obietîf a son sot dai voi di ducj. Il tradiment al passe sot de ideologjie de unitât regjonâl, cul atac sordin  a dutis lis formis di “ecelence” che no àn di jessi plui caraterizadis dal lôr jessi furlanis, ma ben dal “Fvj” (di scrivi dut tacât, cence tratin).
✽✽ Ma ancjemò nol baste! La ipocrisie dal Pd e rive a nivei ancjemò plui alts cuant che si fevele di Nord Est. A pene che si impiin i rifletôrs su la pussibile creazion de macroregjon, la Serracchiani, in vieste di presidente, e fâs fente di sbregâsi lis viestis, e zure che mai e mai altri si fasarà cheste ipotesi di agregazion al Venit. Dopo e torne vicesegretarie dal Partît e e tâs in maniere cussiente devant des esternazions dal so cjâf grup te Cjamare, chel Ettore Rosato, rût triestin, che in dute trancuilitât al aferme che la ipotesi plui increditade e je propit chê dal “Grant Nordest”. No dome che il dam, ma ancje la burlade pal Friûl che al varès di puartâ in dote la SÔ autonomie speciâl ae agregazion istituzionâl neonade.
✽✽ In chest cuadri duncje il dibatiment su la citât metropolitane al cjape l’aspiet di une grande cjolte vie pai furlans, che i lôr dirits di rapresentance unitarie  a son stâts za crustignâts de creazion des Uti.
E se al è pûr vêr, cemût che al sosten cualchidun, che no saran chestis “disposizions di leç” a cancelâ la nestre identitât, in spiete dai numars vêrs sui sparagns efetîfs e sui vantaçs, un prin risultât cheste polverizazion lu à otignût za: nancje un sbalç di rabie e braùre cuintri la fusion de Cjamare di cumierç di Gurize cun chê di Triest, nissune repliche ae sielte delirante dai sorestants pordenonês di sielzi il Venit tant che compagn.
✽✽ Un martielament ai flancs continui e pressant in spiete di molâ il ko. ❚
Dree Valcic

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +