Sfuei Mensîl Furlan Indipendent
Archivi de Patrie

EDITORIÂL – Mai sotans! Cu la berete fracade e no cul cjapiel in man

............


✽✽ No coventin tantis peraulis: lu viodês di bessôi. Il prin numar de Patrie dal 2013 al è chel chi. No plui la riviste che tai ultins agns us è rivade a cjase, ma pardabon un alc di diviers. Dree Venier chi dongje al sclarìs la sô particolaritât, jo o ai di dîus il parcè di cheste sielte. O sin rabiôs! E ancje la cjarte, la scriture a àn di pandi la nestre rabie. Tal stes timp a àn di mostrâ che, se cualchidun al pensave di podê fermâ la vôs storiche de furlanetât, al à falât in plen. Se a Triest a crodevin di taiâ lis gjambis ai furlaniscj, ridusint i bêçs dal contribût regjonâl al nestri gjornâl, chest sfuei, i siei gjornaliscj, i siei letôrs, i siei amîs, a àn decidût di rispuindi cu la fuarce de reson, cu la inteligjence des ideis, cul spirt dal riviel.
✽✽ Gjavâ ae Patrie, ma ancje a chei altris organisim che a doprin la lenghe furlane tal cjamp de informazion, tant che la stesse Regjon nus clame “primaris” pe difusion dal furlan, al vûl dî mostrâ pardabon la muse. E forsit al è un ben, parcè che al mostre, ancjemò une volte, chei che a son de bande dal Friûl e chei cuintri. A son chei che a fevelin di difese des minorancis tes cunvignis par fâsi biei, che a prometin, e sot sot nus odein, parcè che o sin chei che lôr no saran mai: inamorâts dal nestri popul, de nestre tiere. O sin, intune peraule, patriots.
✽✽ Dome il pinsîr che in Friûl a sedin ancjemò feminis e oms, vecjos e zovins che a puedin pensâ al doman de lôr int, ju mande fûr di cjâf. Lôr, ducj lôr, a viodin dome la cjadree, cence ideâi, pronts a cambiâ bandiere daûr dal vint e simpri, simpri sotans di chel che a comandin Rome, Milan e Triest. Il risultât des prossimis elezions al sarà une riconferme di cheste situazion, tant che lis listis presentadis.
✽✽ Ma ancjemò plui fastidi ur ven, cuant che si inacuarzin che o sin testarts, ma soredut brâfs e prontâts. In chescj agns “La Patrie” e je stade la dimostrazion clare, sclete di dôs robis: la prime che no ducj i inteletuâi, i gjornaliscj, a stan sot de capele de italianitât, che no ducj a àn tant che ambizion chê di metisi tal cjâf l’elm di Scipio e la storie che i sta daûr. O vin contade une storie diferente: la nestre. No dome chê passade, ma chê di vuê, cjalant ce che al sucêt cuntun voli diviers de television, dal “Gazzettino giuliano”.
✽✽ La seconde, che o sin lâts indenant pe nestre strade cence cjalâ in muse nissun, cul rispiet pes personis ma cu la fermece de veretât. E viodût che no puedin copânus fisichementri, a àn decidût di fâlu dal pont di viste economic,crodint di fermânus.
✽✽ Di sigûr lis dificoltâts, il pericul di sierâ il gjornâl al è, e ancje fuart. Par fâ front, a alc o vin scugnût rinunciâ. Ma o domandi a ducj: isal just, onest che i nestris fogolârs no podaran plui ricevi gratis il gjornâl, parcè che al coste masse, cuant che si cuvierzin i debits dal teatri comunâl di Triest, dulà che la Regjon e tirarà fûr un milion di euros? O pûr che lis scuelis no podedin plui doprâ i nestris articui pe programazion dal furlan? La Patrie dal Friûl e continuarà a vignî fûr, no larìn a domandâ la limuesine al Palaç, ma o pretindìn che al vegni rispietât il nestri lavôr e la leç. Cheste flamute e restarà impiade. Come che nus àn insegnât chei prime di nô: mai molâ.
Al è un onôr.
Dree Valcic

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +