La lum no si stude

«O vin viodût che la lum no si è mai distudade. Daûr di nô i sês vualtris e daûr di vualtris a ‘nd sarà altris, parcè che la libertât e fâs part de vite e fin che a ‘nd sarà vite, a ‘nd sarà simpri cualchidun che si bat pe libertât dal Friûl.» Cussì al diseve Felix Marchi intune interviste su la Patrie dal Friûl che i fasè pre Toni Beline, cjapade la ereditât dal gjornâl intal 1983. E di fat o sin ancjemò achì a scrivi su chest sfuei 30 agns dopo. E trente agns dopo o sin ancjemò in plui di chei che a scrivevin su la prime Patrie dal 1946, e di chê tornade a vignî fûr dal 1978 cun pre Toni Beline, che al ricjapave in man la lum che no rivaran a scjafoiâ nancje cumò cu lis sfuarfeadis penzis de Regjon. Chê Regjon che e varès di jessi Friûl, e che invezit di fâ il ben de sô int e dal so teritori, ju svent par fâ mangjâ cualchidun.
No cate la crisi, visaitsi che cuant che un politic ti dîs che no son bêçs al vûl dî che no son bêçs PAR TE. Dôs tarondis di mancul, doi capanons inutii che a restin invendûts e sfits (e che a consumin cul ciment il nestri teritori), o dôs tapis di “Giro d’ITALIA” di mancul, e vie che a vegnaressin fûr lis risorsis par mantignî chei bêçs, che a jerin za pôcs prime, dediâts ae nestre culture. Invezit, bot e sclop, lis nestris risorsis a son stadis taiadis de metât.
Cemût parâsi di chest sassinament, si sin domandâts. Sierant? Ridusint i numars? I colaboradôrs? Taiant lis pagjinis? Chest no: no vevin voie di taiâ il servizi che o din: miôr viodi di une forme gnove, prin di dut cu la stampe dome in blanc e neri, Sante Scugne! Ma di cheste Sante Scugne e je vignude fûr la idee di lâ ae lidrîs dai timps li che lis robis si fasevin in blanc e neri e che a son lis lidrîs ideâls ancje dal nestri impegn. Di chi la idee di fâ riferiment a chê prime Patrie dal 1946 fondade di Felix Marchi e pre Bepo Marchet.
La Patrie e rispuint cussì ai tais: cuntun progjet di ricercje e sperimentazion di forme espressive e di contignûts che al va cuintri ae forme dai gjornâi di cumò, simpri plui colorâts, plui piçui, plui comuts, ma simpri plui cence letôrs, cence anime e ideis, al servizi dal potent di turni e no dal lôr popul. La grafiche di cumò e à il savôr di chê dal 1946, e cheste idee nus à dât maniere di fâ un viaç straordenari tal timp, lant a riviodi ideis e formis metudis in bande che declinadis al tierç mileni, in gracie dal contribût creatîf di Pieri Zanini, nus àn permetût di fâ chel che o pensi che al sedi un progjet che al devente adiriture di avanvuardie. Un viaç tal timp no dome te grafiche, si inacuarzarês: vie pal numar a son frasis di chê volte che no àn pierdût nuie de lôr cjame e atualitât (o vin lassâts intats chei document, grafie comprindude, ndr). Ultime curiositât, o vin domandât a lis ditis che a fasevin publicitât in chê volte e che a son ancjemò in ativitât, di jessi presintis par chest numar di 67 agns dopo. La rispueste e je stade positive e entusiaste. Ancje chest nus fâs cjalâ indevant cun snait e muse drete al avignî parcè che “fin che a ‘nd sarà vite, a ‘nd sarà simpri cualchidun che si bat pe libertât dal Friûl”.