EDITORIÂL – Il terorisim nol fermarà la lote par la autonomie

✽✽ L’an si siere intal non de violence e dal orôr. Ce che al è stât fat a Parîs al compuarte consecuencis inimagjinabilis in dute Europe e duncje i tocje ancje al nestri Friûl tignînt cont. Nus rivuarde di dongje pal probleme dai flus migratoris, ma ancje pe disposizion che il guvier al tignarà viers des rivendicazions des minorancis. Che al sedi ben clâr che la concezion dal mont jihadist e je la negazion di ogni nestri principi di libertât e di democrazie.
✽✽ A son messazîrs di muart e di barbarie. Distruzi cheste bestie al è un dovê. Cemût fâlu al risulte plui dificil. O crôt di interpretâ il pinsîr comun a tancj furlans: cuintri l’Isis e je inschiriade une coalizion di stâts che in ducj chescj mês no à otignût di un pont di viste militâr risultâts preseabii. Dome i combatents curdis, cjale câs une minorance nazionâl, a àn resistût dal imprin e dopo riconcuistât,  man a man, lis lôr citât e lis lôr vilis.
✽✽ E cui dispatriâts cemût le metìno? Ju calcolìno ducj teroriscj potenziâi, se no vuê, i lôr fîs doman? E se invezit ju acetìn, ce gjenar di ospitalitât civîl sino in stât di ufrî?
✽✽ O forsit volìno che ancje lis nestris perifariis si trasformin in tantis “banlieue” fûr control e incubadoris di gnûfs “martars” in non di Allah? Al sucêt za in altris regjons, ma ancje dai nestris cjâf lûcs a rivin segnâi di degrât pericolôs.
✽✽ O vin però intes nestris mans un strument preziôs par frontâ chescj moments: la nestre storie. Chê che nus conte cemût che, intai secui, o sin rivâts a integrâ inte nestre civiltât ducj i invasôrs. O rivarìn ancje cheste volte, pûr che chest nestri mût di interpretâ la vite al vedi la pussibilitât di esercitâ la sô influence.
✽✽ Si clamin valôrs, a son il nestri dna. A deventin propositîfs, praticabii e vincidôrs se metûts in stât di produsi ideis, progjets, organizazion civîl e sociâl.
✽✽ Cheste costruzion si clame autonomie, e il terorisim islamic no dome a ‘ndi è nemì par principi, ma e deventarà ocasion di altre pericolositât cuant che, in non de lote cuintri di chel, si domandaran plui struments di control.
✽✽ La campagne che e invide a rinunziâ a spazis di libertât personâl par consintî plui sigurece e je za scomençade. Chê publiche no intardarà.
✽✽ Cui olsaraial domandâ un referendum par riformâ la Regjon, cui laraial in place par difindint la autonomie? Cui cjaparaial la peraule cuintri un guvier centralist che al ofint la democrazie parlamentâr?
✽✽ Par cui che si ustinarà in chestis bataiis, la acuse di “tradiment”, di  “complicitât”, di jessi nemîs di un stât impegnât cuintri il pericul numar un, e je za scrite.
✽✽ O larìn distès indenant: o sin feminis e oms libars.
O fin furlans. ❚
Dree Valcic