EDITORIÂL – Di un furlan de Argjentine

Ogni volte che o torni in Friûl, o ai une ocasion di plui di metimi in contat cun la mê essence. Ce che al è vîf tal gno cûr.
O torni a scuvierzi des odôrs, lûs e sensazions che a son un nudriment.
_Chest sintiment al è tant plui grant cuant che plui e je la int che o cognòs, e par vie dal sens di responsabilitât jessint in chest periodi il president di un grup di furlans: o rapresenti dutis lis malcuietecis e spietis di tancj furlans de Argjentine che a sperin di rivâ a viodi pe prime volte la tiere mai dismenteade.
_ O scuvierç ancje lis esperiencis di chei altris che a àn il gno stes sanc, ma vitis diviersis: par esempli o ai la pussibilitât di imparâ cualis che e son lis preocupazions dal popul furlan in chest moment.
In chest ultin viaç o ai vût mût di sintî une gjenuine preocupazion pal risi de pierdite de identitât, de lenghe e des tradizions, par vie de disparizion des provinciis, e dal pericul de fusion intune macro-regjon, che par altri e je ancje la preocupazion dai furlans in Argjentine.
_Se un nol vîf in Patrie ducj i dîs, a son des robis che no si rive a capî. Cussì no capìs cemût mai che, se intal privât ducj a son cuintri di chestis azions centralistis, no si metin adun in maniere plui energjiche par podê fevelâ cun scletece di chest risi e des sôs consecuencis pal avignî, e a dan la sensazion che a sintin che aromai dut al è pierdût, e che la politiche e je cussì, e no si pues cambiâ.
Lis resons di chestis riformis a àn ce fâ cun l’aspiet economic, e di trop che si sparagnarès cul cambiâ lis robis.
Al è il câs dai calcui che si fasin ogni volte che si vûl spiegâ i tais pes aministrazions comunâls o la sierade dai ospedâi: dome numars. Ma nissun al fevele dal futûr pai lôr dissendents, permetint che si robi la identitât dal popul furlan.
_Vie pe mê permanence, plui di une volte mi è tocjât sclarî che i miei viaçs ju pai dome jo, parcè che si à volût incolpâ di straçariis l’Ent Friûl tal Mont, che di 60 agns al jude simpri lis associazions di furlans che di agns a àn decidût di lavorâ insiemi cun lui. Ma l’Ent al à une grande diference cun chês altris associazions: i Fogolârs a jerin prime che si fasès l’Ent, e a saran ancje dopo, se al ves di sparî.
_Cumò l’Ent al ten di cont i furlans ator pal mont, puartant dongje la produzion artistiche e culturâl dal Friûl, libris e espressions dal dì di vuê, o judant chei che ur covente meti a puest lis sedis par lâ indenant cu lis lôr ativitâts. In plui, al fâs dai cors pai zovins dissendents di fameis furlanis insiemi ae Universitât dal Friûl, il LAB di Glemone e la Scuele Mosaiciscj dal Friûl par fâi cognossi il Friûl. I zovins cuant che a tornin cjase, a trasmetin ce che a àn imparât, ma ancje a scomencin a cirî prodots che vegnin dal Friûl par vivi la “furlanie” li che a son a stâ.
_Cussì a cuietin un pôc chê nostalgjie dolorose dai furlans di Argjentine, fintremai di 3° o 4° gjenerazion. E stant che la diaspore culì si calcole plui di un milion di personis, a puedin jessi une risorse pal Friûl.
_Timp indaûr o ai cognossût la storie di Marc di Morùs, l’ultin puartebandiere dal Patriarcjât di Acuilee.
Di sigûr, Marc nol pensave che dut al fos pierdût… ❚
✒ Eduardo Baschera
President dal Fogolâr Furlan di Buenos Aires