(L)INT FURLANE. Si cambin i simbui par platâ la storie

La Grande Vuere e je ancje la Grande Bausie pal Friûl, la sô int e la sô storie.
✽✽ No si stracarìn mai di denunziâlu e di fâ front cu lis nestris fuarcis ae propagande tricolôr che e spant a plenis mans une retoriche plene di cidinôrs e omissions.
✽✽ Ma par justificâ chest so agjî e cole dispès in falsetâts cussì gruessis che a colpissin chê stesse imagjin che in chescj cent agns e à cirût di costruî sedi a nivel di propagande che di divulgazion popolâr.
✽✽ Us puarti un esempli par sclarî cemût che il nazionalisim talian nol vedi nissune vergogne su cemût presentâ chel che nô furlans, e no dome, o varessin di calcolâ simpri un maçalizi inutil e par chel che nus rivuarde plui di dongje une vuere tra fîs di un stes popul.
✽✽ Mi è capitât, par câs pûr e no par sielte, di cjatâmi devant di une mostre che e figure lis primis pagjinis de Domenica del Corriere publicadis in chei agns avilîts. Lassìn pierdi il tono e i contignûts des didascaliis che a acompagnin lis ilustrazions in prime pagjine dal dissegnadôr famôs Beltrame là che i austriacs a son presentâts tant che bandîts triscj e vonde e metìnsi a viodi ben l’ultim cuadri in mostre: al rivuarde la mari dal milite ignoto e la deposizion dal cadavar al Vittoriale di Rome.  Si clamave Marie Bergamas, e jere nassude a Gardiscje e duncje in chê volte citadine dal Imperi. Intal Otubar dal 1921 al partì di Aquilee il tren che traviers dute la Italie al rivà fint ae capitâl.
✽✽ Inte didascalie e risulte tant che «la triestina Maria Bergamas», scancelant la sô nassite cun chê di meti dongje in maniere palese i sintiments  dismovûts di chel avigniment al rûl de «citât martare».
✽✽ Il stes metodi al ven doprât par un altri lûc simbul de retoriche chê Gurize che, intal celebrâ chê che le clamin “liberazion”, no si fâs nissune alusion ai bombardaments talians che le àn distrute e nancje che si à il pudôr di motivâ il fat che i simbui dal imperi austro ongjarês a son stâts cambiâts cul leon di Sant Marc, cuasi a afermâ une continuitât storiche cu la Serenissime, e duncje la Italie.
✽✽ Pecjât che su la  Contee di Gurize, Vignesie no ves mai podût alçâ sù la sô bandiere.
✒ Dree Valcic