EDITORIÂL – A stâ a cjaval dal fossâl si cole dentri e si mûr inneâts

✽✽ No si pues servî doi parons. O si sta cun Diu o cun Mammona. Par jessi plui lizêrs: tu tegnis pal Udin e vonde, no pe Juve o cualchidun altri. Il diaul e la aghe sante no stan dongje.
Parcè tirâ fûr une cuistion dal gjenar propit cumò? Par vie des elezions e de vitorie di Renzi. Un risultât fûr di ogni prevision – pûr pensant ancje aes percentuâls di astension – che al devente une vore impuartant pal Friûl.
✽✽ Cun ducj chei vôts il Pd al è destinât a deventâ un partît che al comande dut: des aministrazions aes bancjis, dai consorzis al “no profit”. Dut, de economie ae politiche. Di sigûr al sarà ancje alc pes oposizions, ma dut câs lis decisions plui impuartantis a saran dal partît de Serracchiani.
Chi di nô, daspò un an dal so guvier, al è bielzà cussì. No dome in consei, dulà che la oposizion no conte un biel nuie, ma tal paîs.
✽✽ E dulà che nol rive ancjemò, il Pd al dopre l’imprest dal cidinôr.
Su la cuistion de autonomie regjonâl, par fâ un esempli, di une bande si sberle pe sô difese, di chê altre no si dîs nuie su la linie uficiâl dal partît.
Nissun dal Pd al à fevelât di chest: “Si scuen lavorâ sul meti dongje lis Regjons, l’asset di cumò nol ten plui: il Venit, cul Trentin e il Friûl Vignesie Julie a puedin e a àn di costituî dome une realtât”. Cui le à dite? Lucio Tiozzo, cjâf grup dal Pd tal Consei regjonâl dal Venit e Franco Bonfante, vicepresident dal stes.
✽✽ Des dôs, une. Cui aial reson? Il Pd di chi, o chel di Vignesie? E parcè chel di culì nol disial alc su la cuistion?
Cemût ise finide la cuistion de direzion scolastiche? Ise lade a Vignesie o no, ancje dopo lis “baricadis” de Serracchiani?
La linie e je avonde clare: chel che al pues creâ dubis o contradizions al va tignût taponât. Ai imprenditôrs, ai aministradôrs, ai sindicâts, in sumis ae societât. Il progjet dal Pd al à di someâ unic e invincibil. O cun nô o cuintri di nô.
✽✽ Nol covente presentâ documents, numars che a mostrin alc altri. Ce impuartial se il Friûl al prodûs la maiorance dal pil regjonâl: plui impuartant al è Triest. Fevelìn di turisim e cumierç: ducj a san che doprâ la peraule Friûl Vignesie Julie pai nestri prodots al è fûr di cjâf, ma par vê i bêçs de Regjon tu sês obleât a doprâlu. E si podarès là indenant su dut.
Si clame ricat.
✽✽ E cuant che a gloti cheste operazion al è un popul, cemût vino di clamâlu?
O sin duncje denant di une beorcje: di une bande ubidî tant che pioris, di chê altre doprâ il cjâf e il sintiment. Arlechin al servive doi parons, ma al jere un pipinot. A stâ a cjaval dal fossâl, al è sigûr che si cole dentri. Inneâts. ❚