E tu, âstu za la tô copie dal ultin libri dai Gnognosaurs?

«Savêso parcè che si son estints i dinosaurs? Forsit par vie che no jerin po tant scaltris. Anzit a jerin propit gnognos». Al vierç cussì la sô prefazion al cuart libri dai Gnognosaurs Manuele Fior. Nassût dal 1975 a Cesana, ma di gjenitôrs furlans (anzit cjargnei, di Verzegnis), al è ilustradôr e fumetist. Pluripremiat, Fior intal 2011 al à vinçût il premi “Fauve d’Or” al festival di Angoulême in France, vâl a dî l’Oscar dai fumuts.
Ma dal sigûr Momo, Martin, Bombo, e dute la bande dai Gnognosaurs in “The Best(iis)”, il gnûf libri di Dree Venier che o vin presentât sul numar di Setembar, no son par nuie estints, anzit, a son plui vîfs e… gnognos che mai!
Rivade ai 26 di Setembar tes ediculis in distribuzion cul Messaggero Veneto in dutis trê lis provinciis furlanis, la publicazion no à tradît ce che i letôrs si spietavin.
E propit il gnognopublic nol à mancjât di fâ savê lis sôs impressions su cheste racuelte, finanziade cul contribût de Agjenzie regjonâl pe lenghe furlane. Us proponìn un struc di cualchi mail che o vin ricevût.
«Une conferme: la tipiche gnognoesplosion di colôrs e simpatie, e conferme Cristina di Gurize, che no à spietât e za te dì de jessude, Zornade europeane des lenghis, e jere a buinore in edicule.
Ancje Toni di Udin al conferme «O scuen ameti che o ai scuviert i Gnognosaurs chest Istât cu lis strichis dal Messaggero e stant che mi mancjin i prins libris, no mi soi fat scjampâ chest “The Best(iis)” che o lei cun gno fi».
Daniele di Spilimberc al segnale un aspiet particolâr di cheste gnove publicazion «Za cui prins trê titui o ai rivât a cognossi miôr la lenghe furlane scrite, ma in cheste cuarte edizion mi à plasût une vore la part introdutive che ti insegne a lei par furlan: la didatiche e à di evolvisi e i Gnognosaurs, di bogns jurassics lu àn capît prime de scuele». Di fat lis primis pagjinis a àn il titul “No stâ a fâ il gnogno, impare a lei!” un struc cu lis regulis di fonde dal furlan scrit.
La distribuzion in edicule e larà indevant par cuatri setemanis e podês domandâlu inmò fin ai 24 di Otubar al vuestri edicolant di fiducie, ma spesseait: no volarês migo restâ cence la vuestre copie di “The Best(iis)” lis miôr storiis dai Gnognosaurs? ❚
Christian Romanini