… e torne Primevere

Cemût no ricuardâ i mês che a van dai prins di Novembar ai prins di Març dai agns ’76–’77? Vie pal dì tu cjaminavis tune Glemone deserte, sore di stradis sepulidis e grums di maseriis, fra culinis di rudinaçs e materiâi di ogni sorte. A Glemone basse, fra rumôr e fum, va e ven di camions che no menavin vie dome malte, trâfs, fier e beton ma ancje i lûcs e i ricuarts di vîfs e di muarts e ti lassavin confusion tes orelis e il cûr vueit.
◆ Dal sigûr in chei mês a saran stadis zornadis di soreli e viers Maniâ colôrs dolçs tune lûs che va a mont, ma jo o ricuardi dome cîi nulâts, ploie e frêt. Al jere chel il vêr timp, timp dentri di me, dentri dai sorevivûts, dai pôcs restâts tal esodi de int viers Cjaurlis, Grau e Lignan.
Tal rivâ de gnot Glemone e scomparive, cence un lampion o un luminut di vite, glotude tes inferis, supade dal scûr, intant che un cidin suturni ti faseve sintî ancjemò plui fragjil e bessôl.
◆ Par un trat di timp ognidun si è rangjât come che al podeve. Pre Tonin, Vittorio il fedâr e Carlo il ferovîr a durmivin tun box di lamiere li che a stevin a fîl i materàs. Di gnot a colp ti sveave il baiuçâ dai cjans che si clamavin un cul altri: ti visavin che e stave rivant une scosse di taramot e che lôr za le sintivin tes talpis. Tun lamp ti si dreçave la orele: di dulà saressie vignude la scosse, trop fuarte, trop lungje e tu restavis in spiete; in chei seconts di spavent il cuarp si sgrisulave.
A buinore tu jevavis strafont di umiditât.
◆ O ricuardi ancjemò ai 30 di Novembar, gnot di sant Andree a Vençon, che mi vevin dit: “Ven a fânus messe”.
Il centri di racuelte al jere tal plaçâl des scuelis di ca de Vençonasse e jevât de tiere, tu jentravis midiant di une scjalute.
Une grande stanzie, plui magazen che centri di racuelte di int.
◆ Une taule lungje di len e sore une machine di taiâ, une damigjane di vin, alc di companadi sut e minuçariis di ogni sorte; ca e la scjatulons dapardut. La int, chei pôcs rivâts, cualchidun sentât e il rest in pîts; come saradelis, o jerin strets un al altri. Tun cjanton de taule il messalut, il pan, la aghe e il vin de messe.
Di chê sere mi restin vuê il prime e il dopo de messe cuant che o cirivin di dâsi coragjo un cul altri. De messe: blackout complet, nuie. Ancjemò vuê mi domandi il motîf che o ai rimovût de memorie chei moments di preiere, di eucaristie, dal Signôr fra di nô a dânus la sô peraule e confuart. Invezit: cancelât dut; mi restin une int spauride e avilide, la scjalute, il frêt e la gnot.
Però, une copetade plui penze mi / nus spietave.
◆ L’Invier si faseve sintî e une dì pre Pauli Varut, plevan di Vasinis e Bordan, al rive li di pre Tonin e i dîs: “No si pues continuâ cussì; la int no resistarà e la Vite Catoliche no cjape une posizion clare tal denunziâ i fats. O scrîf une letare di denunzie al gjornâl”. Pre Tonin al zontà: “Indi mandi une ancje jo”. Ae iniziative si saressin unîts ancje pre Gjulio Ziraldo plevan di Dalès e pre Checo Placerean di Montenârs. Firmadis e metût il bol, lis letaris a son partidis a destinazion.
◆ Publicadis ai 12 di Fevrâr, a varessin vude une rispueste ai 19/02 cun vincjeun letaris cuintri.
Un fat che ancjemò, come relazion umane, no rivi a capî. O jerin predis che a vivevin tal Invier e infier dal taramot; a pre Tonin trê setemanis prime tun container i jere mancjade la mari, pre Pauli e pre Gjulio sistemâts tune barache fate dai volontaris di S. Vît di Feagne li che pes fressuris a svintavin aiars dì e gnot e pre Checo al berlave fra lis maseriis di Montenârs.
◆ Bisugne dî che la Vite catoliche e denunziave ogni setemane situazions pietosis, e publicave articui e riflessions di pês, di valôr, ma forsit la linie dal gjornâl e jere calibrade tun cuadri gjenerâl fat di vicinance ae int, ma ancje di atenzion ae politiche regjonâl, al partît catolic e ae sorintendence dai vescui talians par vie dai zimulaçs de Caritas. La nestre azion masse libare di predis fra il popul e disturbave e al bisugnave çoncjâle cence remission. Il vescul savevial des vincjeun letaris? No lu sai. Pal sigûr: nol è intervignût. O vin di ringraciâ pre Antoni Beline che i à mandât al diretôr dal gjornâl un scrit di dôs pagjinis e mieze pes “vincj rispuestis lamiis”. La letare, su la Vite catoliche, no je stade publicade.
◆ O ai scrit alc di ce che mi è vignût in cûr a prin colp, ma a onôr dal vêr chel Invier ’76-’77 al è stât tai paîs cuasi cence int un grant laboratori, une farie di incuintris, iniziativis, partecipazion popolâr, gust di cjapâ cussience e di cussientizâ. Di chest tesaur, glorie dal nestri popul, si podarà cjacarâ une altre volte.
Intant al jere rivât Març, si slungjavin lis zornadis, il cîl al veve un altri colôr e l’aiarin de Vierte ti rinfrescjave e ti scjaldave il sanc. L’Invier, fra gloriis e spavents, al jere lât e intal florî de nature si ricreavin ancje nô, pronts a frontâ une gnove stagjon e gnûfs scombatiments. ❚