La transizion jenfri i secul XVIII e il XIX, pe zone gurizane, come pe buine part de Europe, e fo segnade di un traume clamât ocupazion napoleoniche. Se il non dal gjenerâl vignût de Corsiche al rivoche gjeni militâr e grandis bataiis, il teme dal patiment dai civîi tai teritoris invadûts al è di râr ogjet di divulgazion. Par Gurize, o podìn domandâ aes Ursulinis di contâ ce che al capità, parcè che nus àn lassât cronichis che a dan une imagjin vive des dificoltâts che la citât e scugnì frontâ.
◆ Jenfri il 1797 e il 1813 Gurize e la sô Contee a traviersarin trê periodis di dominazion francese. Ancje midiant di cualchi citazion cjapade di chês cronichis, o propon di concentrâsi sul prin, parcè che al fermà in mût dramatic la ete une vore lungje dai Asburcs. Za intal 1796 lis preocupazions a scomençavin a slargjâsi dentri di Gurize, cun feminis e fruts che a lavin a parâsi tes zonis montanis de Contee. Ai 19 di Març dal 1797 i prins contingjents a jentrarin in citât.
◆ Ce che o descrîf al fo dovût soredut al fat che l’esercit francês al fos di jeve, duncje une vore numerôs e bisugnôs di sostignîsi a dam des comunitâts locâls. Il sac al fo ripetût e disastrôs par dut il tiessût sociâl; nissun si fidave di lâ ator pes stradis, che a jerin plenis di soldâts. A agredivin ducj chei che a jerin dongje di lôr, a robavin intes buteghis e a fiscavin lis cjasis sedi dai popolans sedi dai nobii, provocant “dams tâi che no si puedin contâ […]”.
◆ I bens sotrats ai gurizans a jerin i plui varis: de blancjarie al polam, dal len al besteam, dal vin ai cereâi. Il clime di terôr al jere sedi di dì sedi di gnot, no dome te capitâl ma ancje tai paîs dongje. La mancjance di mangjâ te popolazion e jere tant grande che, ancje cu la vicinance de Pasche, “no si faserin fuiacis, ni gubanis e vie indenant, par vie de tante cjaristie”. A Mai a rivarin miârs di altris soldâts, strussiant ancjemò di plui la citadinance, biel che fra i ocupants “Il consum di vin al jere straordenari […]”. “In nissun paîs, specialmentri dopo fate la pâs, si fermarin cussì tant come in cheste Contee […]”.
◆ Tal fratimp, ai 12 di Mai, la Republiche di Vignesie, il vicin problematic che al veve cirût plui voltis di unî dut il Friûl sot dal so podê, e cessà di esisti. Ai 24 di Mai i Asburcs a cjaparin di gnûf il possès de citât, “Fat che al jemplà Gurize cuntune consolazion indescrivibile […]”, tant che lis cjampanis di dutis lis glesiis a sunarin come segn di benvignût. Chest, però, nol fo dovût a une cuintri-invasion, ma ai Preliminârs di Leoben dai 17 di Avrîl, che a anticiparin il plui cognossût Tratât di Cjampfuarmit, firmât dome ai 17 di Otubar. Chest al sclarìs il riferiment a chê strane “pâs” menzonade prime.
◆ Lis consecuencis dal domini francês, di fat, no si riduserin ai disasis dal moment, ma a produserin efiets luncs su la economie e, in gjenerâl, su la impuartance de regjon gurizane. E o scomençarìn di culì la volte prossime. ❚
Il flagjel napoleonic
Enrico Rossi
