Pal cincuantesim, no dome celebrazions…

Par chei che lu àn vivût, chel sîs di Mai dal mil nûfcent e setantesîs (e ancje chel dal cuindis di Setembar) al reste un moment che no si dismentearà. Un spartiaghis che al taie la storie dal Friûl tra un prin e un dopo. Dal pont di viste economic, il taramot al segne il moment di take off de economie, al conferme il trend di un procès di svilup za inviât ma che su la ale de ricostruzion al ven esaltât. Cul sisme il Friûl al è tal cûr dal mont, ancje i talians fintremai si inacuarzin di un popul e di un lûc fin in chê volte cognossût dome pes casermis e pes massariis. Cu la ricostruzion, in gracie des deleghis ai sindics, al nas il “modello Friuli” chel dal mot “prime lis fabrichis, po lis cjasis e dopo lis glesiis” e de “protezion civîl” di Zamberletti. Di in chê volte vonde Friûl migrant e, cu la Universitât dal Friûl, la braùre e la volontât di meti in pîts une classe dirigjent nostrane. La autogjestion des comunitâts tes tendopolis su la ande des antighis viciniis e lis cjasis dulà che a jerin e come che a jerin, come une sfide. Intune desene di agns tornâts a fâ sù i paîs di plante fûr, recuperadis glesiis e vilis, ristorât cjistiei e recuperât lis oparis di art.
◆ A cincuante agns memoreâ e, parcè no, celebrâ l’inovâl al è just e dovût: pai muarts, par chei che a àn lavorât cence padin, pai volontaris che a pitinton a son rivâts a dâ une man, pai aministradôrs e pai politics che par une volte si son dâts dongje cence diference di colôrs pe lôr int. Pe Italie che e à metût i bêçs (che in part o vin fintremai tornât indaûr).
◆ Ma o varessin gust che, dopo vê alçât lis tacis e vêsi dit “ce brâfs che o sin stâts”, parcè che il miracul de ricostruzion al poie su la fuarce di volontât e su la capacitât di lavôr des furlanis e dai furlans, se dopo dut chest sacrisant ricognossiment si cjalassin tal spieli e si domandassin: “Sino simpri chei di une volte?” Vuê dal sigûr o stin miôr di prime, o sin deventâts ancje nô citadins di chest mont globalizât, nol mancje il franc e, come ducj tal mont ocidentâl, o vin imparât a consumâ, ma vino forsit pierdût alc pe strade? Parcè vivìno tal ingôs di pierdi chel pôc di benstâ a pene concuistât e cun ce fature? Dulà isal lât il sens di paîs? Parcè si staial sfantant chel conetîf sociâl des comunitâts di un timp? Parcè no corino plui fruts tai nestris borcs e tes nestris placis? Mancjie la voie di vivi? Vino ancje nô “dismenteât lis nestris sfiondis zint jù viers Pordenon e il mont” come i “miei fantats” dal poete di Cjasarse? Vevial reson il frari di Coder cuant che, incorât, al diseve “Mê tiere mandi”?
◆ E insom il dubi teribil:”Saressino in stât vuê di tornâ a fâ sù il cûr dal Friûl se, Diu nol vueli, al ves di tornâ un taramot di chê sorte? ❚