E torne a partî la poie aes scuelis

La Fondazion Friûl, inte sô sede di palaç Antonini Stringher a Udin, e à ilustrât il gnûf Bant Istruzion, che, in graciis de colaborazion cun Intesa Sanpaolo, al conferme un font di 600 mil euros par poiâ azions indreçadis a infuartî la ativitât didatiche e la sperimentazion di modei formatîfs inovatîfs. In particolâr, a varan un contribût i progjets che a tocjin la mobilitât internazionâl, il doposcuele, il miorament des competencis motoriis e i percors pal benstâ de classe e de scuele. Lis domandis di contribût a podaran jessi presentadis dentri dai 20 di Març di scuelis publichis o paritariis des provinciis di Udin e di Pordenon, e a valaran par progjets di disvilupâ intal an scolastic 2026-27, cun tiermin pe realizazion ai 31 di Avost dal 2027.
◆ “Cul gnûf Bant Istruzion, la Fondazion Friûl e conferme la sô mission prioritarie: invistî intal capitâl uman tant che pilastri pal avignî des nestris comunitâts – al à comentât il president Bruno Malattia –. No si trate propit di un apontament che si rinove, ma il consolidament di un model di supuart che intal timp al à dimostrât di savê intercetâ lis dibisugnis veris dal mont scolastic intal nestri teritori. La continuitât di cheste iniziative, che e je pussibile in graciis de sinergjie cu la Intesa Sanpaolo, nus permet di ufrî aes scuelis e aes fameis un pont di riferiment sigûr par infuartî la ufierte formative, de internazionalizazion al benstâ psicofisic dai students. In chescj timps, là che lis sfidis educativis a son in evoluzion continue, la Fondazion e sielç di sostignî chei percors bogns di coniugâ inovazion didatiche, inclusion e cressite globâl dai nestris zovins”. ❚