✽✽ Ce restial tra lis pagjinis di dutis lis manifestazions, i incuintris, i libris che si preparin par celebrâ “uficialmentri” i cincuante agns dal taramot? Us al dîs jo: nuie, se no il ricuart dai propris cjârs, di cui che nol è plui e il titul dai gjornâi pai studiôs che intal futûr prossim a laran in biblioteche a fâ cualchi ricercje.
✽✽ Dit cussì al somee avilent, ma se lu interpretìn intune altre maniere, chest nus ufrìs invezit une grande oportunitât: la responsabilitât. Alc che nol pues vignî di cui in chescj 50 agns nol è stât bon di tornâ a fâ chê esperience vincidore de ricostruzion, di cui che vuê al prove a istituzionalizâ chel che, propit pe sô origjinalitât e specificitât, nol podeve jessi codificât dentri une suaze “aliene”.
✽✽ Cumò al bisugne vê il cûr di cjapâsi sù la cjame e l’onôr di rapresentâ chei oms e chês feminis che a son stâts bogns di cjatâ fûr il cors de storie tra lis rudinis, tornâ a fâ nestri dut chest par podê inverâ chel miracul di sorevivence coletive.
✽✽ E covente jessi cussients che l’Orcolat nol è stât batût une volte par dutis. Al tornarà dongje domandant ogni volte un contribût di dams e tragjediis. No si trate dome di frontâ un probleme lassât ae nature, ma di capî ancje cemût che il troi di autonomie di un popul nol sedi dut dret e pacific. A frontarin une vore i ostacui che a son stâts, che a son e a saran denant di nô par che chest sium antîc des nestris ints si rivi a puartâ insom.
✽✽ Fasìn alore une schirie di paragons: no vignivino cjolts vie e calcolâts fûr di ogni logjiche i abitants di Vençon che a domandavin la ricostruzion de lôr citadine “cemût che e jere”? E i volontaris che a scrivevin il numar su ogni piere des muris e dal domo par che nol les pierdude nancje une? E no jerino forsit mats chei che fint di subit si sono oponûts ae idee di une ricostruzion dilunc de Pontebane, che e varès significât la creazion di une perifarie industriâl imense?
✽✽ No, a jerin propit cussients che la pierdite des lidrîs e varès significât ancje la fin des comunitâts. A àn fat cuintri, a àn lotât e a àn vinçût.
✽✽ Nô vuê si proclamìn erêts di chel moviment. No volìn jessi presuntuôs intal afermâlu, no lu fasìn par svant: e je la uniche strade di percori par no finî cjapâts sot e cancelâts di un pinsîr unic e che al omologhe.
✽✽ Inte bocje dal Orcolat plui diabolic. ❚
