A Mont di Crôs la Academie cence confins des jerbis di mont

Al Pas di Mont di Crôs, fra Cjargne e Carinzie, e nas la Academie des Jerbis di Mont / Akademie der Bergkräuter, un gnûf centri transfrontalîr dedicât aes jerbis alpinis, ae biodiversitât e ae culture gastronomiche di mont.
◆ La Academie e je stade fondade di sîs esperts: 3 talians, 2 austriacs e 1 lussemburghês, metint adun dôs animis:
– botaniche e benstâ, cun specialiscj in erboristarie e coltivazion biologjiche;
– gastronomiche e didatiche, cun cogos e professioniscj dal gust, tra chescj il chef dal Ristorant “Al Valico”.
◆ La Academie e vierzarà in Avrîl e e proponarà fint a Novembar cors di cognossince e racuelte das jerbis, laboratoris di cusine e trasformazion erboristiche, menûs gastronomics tematics, laboratoris di ricercje e dialics transfrontalîrs.
L’obietîf dal progjet al è valorizâ il patrimoni naturâl alpin, rinfuarcî i leams tra il Cjanâl di Sant Pieri e la Lesachtal e promovi la mont tant che risorse preziose pe salût, pe culture e pe identitât alpine.
◆ “Daûr di dut chest nol è nissun finanziament. E je une robe partide propit cussì!” – e conte Ursula Puntel, une des fondadoris di chest progjet, diplomade erboriste e imprenditore agricule (o vin za fevelât de sô aziende su la ‘Patrie’ dal Dicembar dal 2021). “In realtât il promotôr di cheste idee al ven di fûr. Agns indaûr si jere inamorât di chest teritori e al à fat sù ancje cjase sô achì. Jo lu ai cognossût in graciis di un gno barbe. Lui al è restât colpît plui che altri dal amôr che o vin pal nestri teritori. Mi à dit: ‘O volarès fâ alc par dâi plui valôr’. Intal stes timp al veve cognossût il cogo di Timau che al lavore ‘Al Valico’, Fabrizio Damiano Casali (che jo o cognossevi za di viste ma no dal pont di viste professionâl), e nus à fats cjatâ la prime volte a Mont di Crôs cheste Istât. Dopo un invît a une degustazion, si sin confrontâts, o sin jessûts a çumâ cualchi plante ator venti e e je nassude la idee di chest progjet che al proviôt il coinvolziment ancje di personis de Austrie. Fabrizio al à tirât dentri Klara Obernosterer (specialiste in jerbis salvadiis de zone de Lesachtal), Tanja Guggenberger (coltivadore biologjiche intal Guggenbergerhof) e la coghe lussemburghese Marie Louise Malou Loos. Jo invezit o ai coinvolt Chiara Selenati di Sudri che e fâs cors di cusine a cjase sô e che dispès i colabori cun jê. I puarti personis par cjapâ sù lis jerbis classichis che si cjatin tal teritori e jê dopo ur insegne a cusinâlis. In chest progjet o ai vude la ocasion di cognossi Klara plui di dongje; o soi lade a cjase sô e jê e je vignude tal gno laboratori. La mê idee, come la sô, no je chê di coltâ tant, ma di çumâ tant il salvadi. Jê lu trasforme cuasi dut (e fâs tancj alcolics, masarâts, termoderivâts e alc altri che in Italie no si pues fâ). E à creât un marcje sô, cun tant di certificazions biologjichis, nancje fevelâ. Mi à dât cetancj conseis par valorizâ di plui i miei prodots. Ma tornant al progjet, o stin creant un percors di ricognossiment des jerbis che a son tai nestri teritoris che a vignaran valorizadis cu la lôr trasformazion. O pensavin di continuâ a confrontâsi fasint jessudis ancje in Austrie par capî ce che a àn lôr di diferent di nô, valorizant jerbis che nô o calcolìn pôc o il contrari. L’obietîf al è chel di rinfuarçâ i leams tra un teritori e chel altri promovint la mont e ce che e da la mont. Ce che nus da la tiere al è sacri e di tignî cont. Cuant che o fâs lis jessudis, ur racomandi aes personis simpri la regule: ‘Une si cjape sù e cuatri si lassin aì’ – par garantî la lôr ricressite, come che a àn simpri fat i nestris vecjos.” ❚