E DUCJ A VIVERIN… FURLANS E CONTENTS. Blancjenêf e i siet nanui

E jere une volte, intun bosc de Cjargne, la fie di un re: une fantate bielissime che si clamave Blancjenêf. Muarte la regjine, mari de fantate, il pari si jere tornât a maridâ cuntune triestine, che e jere une vore gjelose.
La madrigne e veve un spieli magjic e ducj i dîs i domandave: “Cui ise la plui biele di Cjargne?”. E il spieli, che jessint furlan no voleve dâi sodisfazion a une di Triest, al rispuindeve simpri “Blancjenêf!”. Par jessi plui biele, la gnove regjine e lave ducj i dîs a cjapâ il soreli a Barcola, e spindeve un grum di bêçs in cremis e cremutis, ma nuie ce fâ: la plui biele e jere simpri Blancjenêf.
Cussì, une dì la madrigne e clame un cjaçadôr e i ordene di copâ Blancjenêf e di puartâi il so cûr tant che prove de sô muart. Ma il cjaçadôr, che al jere un bon om, invezit di copâ la fantate al va li di jê e le vise di lâ a platâsi tal bosc, intant che lui al cope un purcit par puartâi il cûr ae madrigne.
Blancjenêf, scjampade tal bosc, e cjate une cjasute piçule piçule, dulà che a vivin siet nanui: Cjapilu, Sparagnilu, Stropilu, Distrighilu, Mateilu, Cjossolilu e Sghiribicilu (un nanul che zuiave simpri di balon).
Par no savê ce fâ, intant che i nanui a tornin di vore, e met sù une cjalderie di polente e si met a cjapâ sù un pôc di sclopit par fâ une fertaie.
La regjine però si insospetìs, parcè che – stant che dal purcit no si bute vie nuie – insiemit al cûr, il cjaçadôr i puarte dongje ancje doi salams, un muset, un persut di Sant Denêl e un speck di Sauris. Cussì e fâs al spieli la solite domande, e il spieli i rispuint: “La plui biele e je simpri Blancjenêf! Cumò però molimi e va a vore!”.
Cussì, vude la conferme che Blancjenêf e je vive e che il cjaçadôr le à freade, la madrigne e decît di fâ di bessole: e invelene un frico e, vistide di vecjute, e va a cirî la fantate tal bosc par fâi mangjâ il frico e copâle.
Ma Blancjenêf no je plui tal bosc: par no stâ cu lis mans in glove a cjase dai nanui e jere lade in miniere cun lôr cjantant “O nin, o nin, o nin a lavorâ”, ma ancje “O ce biel, o ce biel cjistiel a Udin”.
Te miniere, Blancjenêf e cognòs il princip, che al è li a lavorâ ancje lui, e insiemit a metin sù cjase cul mutui agjevolât regjonâl intant che la madrigne, tornade a Triest, si beche une ustion a Barcola e i vegnin tantis di chês grispis che no si fâs plui viodi ator.
Lis flabis di Bete di Spere