Vinars 14 di Setembar li dal Cine Centrâl
FriuliDoc 2012, grazie a la colaborazion dal Centri Espressions Cinematografichis, al ospite la presentazion dal dvd “La fabriche dai predis” di pre Antoni Beline.
Pai 5 agns de sô muart, La Patrie dal Friûl, Glesie Furlane e VideoTeleCarnia a àn volût memoreâlu cun chest video che al è la interviste di presentazion dal so libri che al à fat plui scjas.
Te videointerviste pre Antoni al fevele in struc dai contignûts e des motivazions che lu àn puartât a scrivi il libri omonim, ritirât subit dopo de metude in onde di cheste presentazion televisive, che in chest dvd e je te version integrâl inedite.
“La fabriche dai predis” e je un diari che al ricostruìs i agns de infanzie e dal ‘seminari di pre Antoni, puartant esperiencis diretis e riflessions intimis.
Vie pe serade di FriuliDoc, che si tignarà li dal cine Centrâl in program aes 7 di sere di vinars ai 14 di Setembar, a intervegnaran pre Roman Michelot, president de Patrie dal Friûl e amì di pre Antoni Beline; Celestino Vezzi di VideoTeleCarnia e Dree Valcic, diretôr da La Patrie dal Friûl. ■
REDAZION
