CUSINE. Siore broade

Se e je une buine lezion che nus rive de culture contadine – une lezion une vore impuartante in timps di crisi tant che chei dal dì di vuê – al è il fat che no si bute mai vie nuie cence prime pensâ ben se no je forsit une altre maniere (ancje fantasiose) di doprâlu, che si trati di un vanzum o ancje di une robe che no nus da sodisfazion.
E nol è nuie che al rapresenti miôr cheste lezion che la broade, “unicum” dal dut origjinâl de cusine furlane, che al nas propit de idee di cualchi contadin gjeniâl, che une volte si è cjatât cun cualchi râf grues, masse dûr e cuntun savôr masse marcât par podêlu mangjâ in salate o lessât (une robe, insome, che par solit al butave tal paston dal purcit), e cuntun podin di puinte restade dopo vê strucât la ue par fâ il vin. E chel fantasiôs contadin – che o vin dismenteât il non, ma che il Friûl al continue a onorâ, replicant te sô culture gastronomiche la sô intuizion – al à pensât ben di provâ a butâ dentri in chel podin i râfs, cuntune grimpade di sâl, po dopo di spietâ un pôc di timp (un mesut, plui o mancul) e – cun chel che al saltave fûr, gratât e passât un tic in padiele cun cualchi condiment –  viodi se e podeve nassi une robe buine di mangjâ ancje pai cristians. E je lade une vore ben, parcè che cussì e je nassude la broade, la specialitât in assolût plui origjinalmentri furlane che e sedi, il contor perfet par un altri tesaur nassût, tra mistîr e esperience, tra cjôt e cjanive: Sô Ecelence il muset.
Une tradizion lungje di secui, documentade come usance ben plantade in Friûl (ma ancje te aree di Triest, dulà che le clamin “rava garba”) za tal 1810 dal professôr di agrarie Filippo Re (“Annali dell’agricoltura nel Regno d’Italia”); ma in realtât za nomenade in maniere un pôc plui gjeneriche intal “De Re Coquinaria” di Apicio, un cuart di secul prime di Crist.
Une tradizion forsit presint di tantis bandis, ma che dome in Friûl e je stade preservade fin in dì di vuê, tant di deventâ une specialitât “tipichementri furlane”, a ducj i efiets.
In gracie di cualchi produtôr che, no content di fâsi la broade in cjase par famee e amiis e muarte li, al à pensât che e fos ore di movisi par vuadagnâsi un ricognossiment uficiâl, si è rivâts tal 2011, dopo di un lunc percors, a viodi finalmentri cheste specialitât tutelade de marche “Dop”, vâl a dî di “Denominazion di Origjin Protezude” (www.brovadafvg.it). Cussì almancul o podìn jessi sigûrs di no vê mai di assisti ae comercializazion di une “broade made in China” (che, di chescj timps, a pensâ mâl no si fâs pecjât!).
In dî di vuê – Dop o no Dop – cu la riscuvierte dai savôrs dal teritori, ancje la broade e je tornade in pompe magne tai menûs dai ristorants, e al è un segnâl interessant il fat che al è avonde facil cjatâ tal supermarcjât, chi in Friûl, bustis sigjiladis di 1-2 chilos di broade di stagjon, e fintremai di broade in scjatule: prove che, evidentementri, al è un prodot che al  rapresente un marcjât interessant.
Une volte puartade a cjase la broade – miôr se e rive di un amì contadin, ma se no e va ben distès –, al tocje preparâle. Dal comitât pe tutele di chest prodot, il consei al sarès chel di cusinâle in maniere avonde spartane, metintle sul fûc cuntun tic di vueli scjaldât cuntun spic di ai, sâl, pevar e une fuee di orâr. Fevelant invezit cun tancj altris cultôrs – e lant daûr de none di cui che al scrîf… – la miôr maniere e je chê di meti te pignate dut a frêt: la broade, une cevole taçade fine, un o doi spics di ai, un pâr di sfueis di orâr, un got di vueli e une cocule di spongje, meti sù sul fûc bas e reonzi cun aghe. Miôr ancjemò se e je la aghe dulà che si sta cueint il muset: forsit un tic grassute come filosofie, ma dut câs no stait a gjava distès la spongje che e covente a smuartî la aciditât (tant no si mangje broade ogni dì, par une volte si pues ancje esagjerâ…).
E – par stâ al consei di un grant apassionât – impensâsi di fâi cjapâ “7 cuetis”, che al  vûl dî zontâ aghe, puartâ a fâ bulî e lassâ suiâ al pont a pene prime che e scomenci a tacâ, almancul par siet voltis. ■
Margherita Timeus