«E si fasin incuintre i dîs e s’in van come amîs/ ch’a ti lassin la gole di vin/ Come dut ce ch’a cress/ Ce ch’a cress e no si capiss/ Come ce ch’i vin fat in cuintretimp».
Une poesie lungje un album. Dopo velu scoltât al è cussì che si pues definî il disc di esordi di un dai plui grancj cjantautôrs furlans. Vincidôr de ultime edizion dal Festival de Cjançon furlane cun A no reste plui nuie e artist preseât no dome in Friûl pe sô poetiche e vôs, Franco Giordani nus conte il so prin album di solist, jessût tal 2015: Incuintretimp, pe etichete furlane Nota e za finalist de Targa Tenco 2015, sezion Opera prima.
A traviers lis notis di ghitare, armoniche, mandulin, flaut, bouzuki e banjo l’artist al vûl presentâ il Friûl.
Insiorât di notis autobiografichis, dai tescj des cjançons e imagjinis sugjestivis, l’album al met adun 13 tocs plui un speciâl. Il dut no dome par furlan ma ancje inte lenghe dal artist, il clautan, e daspò talian e inglês.
«Incuintretimp al puarte il scoltadôr a pensâ al timp che al passe, dal jessi cuintri, cirî l’incuintri, ma jessi simpri in cuintretimp»
«Il Friûl al è une miniere di musiciscj bravonons» nus conte Giordani, tabaiant di ducj i artiscj che al à clamât dongje par fâ l’album. «I tescj di diviersis cjançons ju ai scrits a cuatri mans cun i tant stimâts Luigi Maieron e Barbara Floreancig. O ai in plui domandât ai miei amîs di lungje date, Elvis Fior e Paolo Manfrin, di partecipâ aes regjistrazions parcè che a cognossin ben il gno “habitat” e o ai coinvolzût ancje strumentiscj che a podevin insiorâ i mei tocs cun la lôr personalitât (Simone Serafini, Tony Longheu, Miky Martina e Vittorio Vella). Par finî, Irene Dolzani e à zontât mil emozions di plui cun la so vôs bielonone».
Lis primis cjançons e fevelin propit dal timp, tacant cun Cuintretimp che i da il titul al album. Cul secont toc, Quando sei in guadagno, Giordani nus invide a cjapâ dut ce che al ven de vite e daspò al fevele dai moments di fame che dopo a vegnis dismenteâts cun Nel giro di uno sguardo. Cun Piel Scure e Gente persa per la città l’artist al cjale ae citât par contis di vite cuotidiane. E daspò, tacant cun Prove a dîmi tu, Cosa importa, Non ho mai e Solitudine e libertà l’artist nus fâs jentrâ tal so cûr, contantnus dal rapuart di cubie e di domandis che a cirin rispuestis. Infin al tabaie di musiche e sucès cun i ultins tocs Fum, La Ballata di Ricardo, La musica è una preghiera e Effetti speciali. L’album al à dentri un toc finâl in inglês: la interpretazion di Giordani di The Old Triangle, la balade dal irlandês Brendan Behan.
«O adori ducj i tocs, dal prin al ultin. Nel giro di uno sguardo al è forsit chel che i soi plui leât, parcè che o soi di simpri inmagât dal teme dal timp. O cjanti di fat Tutto accade presto, tra oggi e domani, tutto nel giro di uno sguardo. Al è dificil, ma o vin di cirî di vivi tal presint cun fuarce. Il passât no si pues cambiâ, il futûr no si pues previodi».
Il Cd si compre contatant le cjase discografiche Nota (dal sît www.nota.it o scrivint a info@nota,it), a l’Angolo della Musica in vie Aquileie a Udin, e si pues discjamâ di iTunes. Giordani al è za stât invidât a presentâ l’album in diviersis rassegnis e events internazionâi. Par dutis lis novitâts, imagjinis e notiziis sui concierts baste fracâ www.francogiordani.com. ❚
✒ Moira Pezzetta
_____________________________________
Biografie
Franco Giordani al svante un lungjissim percors musicâl, tacât cuant che al veve juste 14 agns.
Si è esibît come frontman des cover band Klautans e Top Secret e daspò i Lollipop, fondant i Bottle of Smoke.
L’artist al à une formazion a 360 grâts, come poete, musicist e autôr, partint dal rock plui agressîf fin ae musiche folk cun il cjantautôr cjargnel Luigi Maieron. Al à cjantât par Pape Giovanni Paolo II, partecipât al Mittelfest cun la Polifoniche udinese, al ere a Milan cun i grancj nons de musiche, come Francesco De Gregori e Enrico Ruggeri, a Torin par il 150m aniversari de Unitât di Italie, cun artiscj come Davide Van de Sfroos, Roberto Vecchioni, e infin cun Mauro Corona e Toni Capuozzo al à recitât in Tre uomini di parola. Tantis poesiis e componiments che al realize a àn ricevût premis e segnalazions a concors nazionâi e internazionâi e al va indevant a colaborâ cun grups in regjon e fûr. ❚✒ M.P.
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +