Sfuei Mensîl Furlan Indipendent
Archivi de Patrie

Domenico Balzani

............

Movimento 5 Stelle

Un bariton par cambiâ musiche ae politiche furlane
Gnûf di esperience politiche, Domenico Balzani al à 49 agns e si presente ae Cjamare intal coleç uninominâl di Udin, definintsi tant che “esterni” dal Movimento 5 Stelle. Nassût a Alghero, in Sardegne, ma furlan di adozion di plui di 20 agns, al è artist liric e al insegne cjant e direzion dal spetacul al conservatori Tomadini di Udin (ma ancje a Vignesie, Cagliari e Lucca). Atenzion ai lavoradôrs autonoms e dipendents, famee e istruzion a son i ponts principâi de sô campagne eletorâl.

1. Lis Regjons a statût speciâl a àn di vê la pussibilitât di doprâ, intun rapuart di reciprocitât cul Stât, lis risorsis produsudis sul lôr teritori. No soi di chei che a acusin il guvier regjonâl passât, ma la autonomie de Regjon Friûl-Vignesie Julie e merete plui rispiet.Chei pats a somein plui imposizions che acuardis.
2. Intai agns o ai promovût incuintris e conferencis di confront tra lis minorancis sardis e furlanis. Di sart o ten tant ae mê lenghe, e la tutele des minorancis e je une dai ponts fers de mê campagne eletorâl. Il guvier centrâl al difint pôc chestis risorsis culturâls che invezit a son impuartants ancje pe economie. L’insegnament intes scuelis al va garantît e intensificât. A van dâts spazis oportuns sul canâl Rai 3, includût un telegjornâl par furlan.
3. A son invistiments impuartants di fâ in teme di infrastruturis. La autostrade A4 e lis feroviis a son un cuel di butilie pe economie. Se i traspuarts publics viers il teritori interni a funzionassin ben, i turiscj che a rivin a Triest cu lis croseris a podaressin visitâ ancje il Friûl.
4. No si è fate mai une politiche serie pes fameis. Si ‘nt fevele tant, ma cence mai tradusi lis peraulis in poiis concretis, tant che i aiûts aes maris che a lavorin (asîi nît gratuits, contribûts pes spesis di istruzion). Dal sigûr, cui che intai decenis al à creât chescj problemis nol pues jessi clamât vuê a guviernâ par risolviju. Voltìn pagjine!
5. Pal Movimento 5 Stelle dutis lis sieltis impuartantis a àn di jessi cjapadis cui citadins. La politiche si fâs cu lis personis, che no àn dome di jessi informadis ma ancje includudis, cussì che dai citadins a puedin vignî propuestis plui buinis di chês che a son su la taule. O pensìn a une Italie al 100% rinovabile. Il futûr al è un ambient net e san che al alci la cualitât de vite dai citadins, e chest al crearà gnûfs puescj di vore.

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +