Sfuei Mensîl Furlan Indipendent
Archivi de Patrie

TERITORI. Dober tek! – Bon gustâ!

............

Cui nol aial mai dit di nô Furlans: “Nin a mangjâ in Slovenie (o in Jugo, fin al inizi dai agns Novante dal secul stât) parcè che si sparagne”? Dal prin di Zenâr dal 2007, di cuant che ancje a Lubiane al è rivât l’euro, chest nol è plui tant vêr. Une resinte ricercje Eurostat e à pandût che il presit che si paie in Slovenie pe mangjative al è l’88% de medie de Union europeane. In Italie la percentuâl e cres fin al 116%, ma tai ultins mês ancje tal paîs a Soreli jevât al è lât sù un grum ce che si scuen paiâ par comprâ di mangjâ e par lâ intun ristorant. E l’inflazion che e va di corse al è un dai argoments plui impuartants de campagne eletorâl pes votazions politichis dai 21 di Setembar.
Ma viodìn ce e cemût che si mangje in Slovenie. Siben che al sedi un piçul Paîs, grant nancje trê voltis il Friûl, dut câs come la Piçule Patrie al cjape dentri di sé il mâr e la mont, i lâcs e i flums, lis citâts e la campagne. Ancje il clime al è diviers: su la cueste adriatiche clip dilunc l’Invier, cjalt d’Istât; su lis monts clime alpin, tal centri e tal soreli jevât clime continentâl. Cun di plui, il fat di vê simpri vût fuarts leams cui Balcans, cui monts latin, gjermanic e ongjarês al à permetût ai Slovens di miscliçâ lis lôr usancis cun chei dai popui dongje. Clâr che tal paîs si podedi cjatâ une vore di plats diviers (un miâr!), dal pes al salvadi, des mignestris aes luianiis, dut di mangjâ tes centenârs e centenârs di gostilne (oben ostariis) di conduzion familiâr sparniçadis par dut il teritori.
I Slovens a mangjin tante cjar, soredut cjar di purcit, cuete in cetantis manieris difarentis cun patatis, verzis e fasui. Il purcit si dopre ancje par fâ sopis, tant che il ricˇet. Nol mancje il sanganel, che in sloven si lu clame krvavica (kri al vûl dî sanc). Tipiche e je la Kranjska klobasa, la luianie di Kranj, fate cul 68% di cjar di purcit, il 12% di cjar di manç e il rest di pancete. Di no dismenteâ nancje il persut crût dal Cjars, suiât de Buere.
Simpri fevelant di cjar, in dut il paîs si cjatin doi plats di importazion, un austriac (Dunajski zrezek, bisteche impanade ae vienese) e un ongjarês (il gulash, cun cjar di manç).
Su la cueste adriatiche al domine il pes, cuet in dutis lis manieris, tacant dal brodet, il brût di pes. Dilunc de valade dal Lusinç tancj ristorants a àn tal menù plats fats cu la trote pescjade tal flum che dopo al rive in Friûl.
Pai prins in Slovenie si mangje la juha, une sorte di sope: a ‘nd esistin un centenârs di recipis diviersis! Par solit si fâs cun jerbis, verduris, crauts e foncs; la juha e pues jessi plui o mancul penze.
Ogni regjon dal paîs e à la sô cualitât di pan. Stes discors pai štruklji: a puedin jessi dolçs o salâts, si fasin rodolant sfueis di paste mitint dentri pomis, marmelade, ricuete, mîl, nolis… Insome, ce che al plâs di plui: in dut a son plui di setante recipis. Ancje la prekmurska gibanica e pues jessi divierse di regjon in regjon, di cjase in cjase: si trate di meti sfueis di paste une sore chel altri, framieç – come pai štruklji – si pues meti nolis, tocs di miluç, ricuete, ue passe… Di derivazion balcaniche al è il burek, che si pues cjatâ di Istanbul a Lubiane: al è une torte basse riplene di cjar, di formadi o, par esempli, di miluçs, e in Slovenie al è une sorte di fast food. Ancje pai dolçs al è ce sielzi. Cui no aial mai mangjât une potica e une palacˇinka? La potica e je une sorte di strudel, la palacˇinka une sorte di crêpe: clâr che dentri si pues cjatâ di dut, dal dolç al salât. La pinca (lei: pinza) la si cjate ancje in Friûl, ma mintri che ca di nô si la mangje pe Pasche Tafanie, in Slovenie si use fâle pe fin de Coresime. Cui che al va a Bled a viodi il biel lacut alpin al scuen cerçâ la kremna rezina, une paste alte almancul 6-7 centrimetris: doi sfueis di paste sfueade e framieç creme a volontât.
Alessio Potocco
____________________________________
Ve ca cualchi peraule che us pues coventâ par lâ a mangjâ in Slovenie.
GOSTILNA – ostarie
RESTAVRACIJA – ristorant
ZAJTRK – gulizion
KOSILO – gustâ
VEČERJA – cene
RAČUN – cont
KROŽNIK – plat
STEKLENICA – butilie
KOZAREC – tace
VODA – aghe
VINO – vin (BELO VINO – vin blanc; ČRNO VINO – vin ros)
PIVO – bire
MLEKO – lat
MASLO – spongje
KAVA – cafè
KRUH – pan
MESO – cjar
ZELENJAVA – verdure
SADJE – pomis
SLAŠČICA – dolç (non)
Ce bevi in Slovenie
Se si fevele di mangjâ no si pues dismenteâsi dal bevi. Par chel che al inten i vins, la Slovenie si divît in trê zonis di produzion: Podravje (di là dal flum Drave, dongje de Ongjarie), Posavje (di là dal flum Save, tal centri dal paîs) e Primorska (oben il Litorâl, des Alps fin al mâr Adriatic). Ducj i vins a son di cualitât medie-alte. Su la cueste si pues bevi Teran, Moscatel blanc, Ribuele e Malvasie. Tal rest dal paîs si cjatin vins che o vin ancje in Friûl, tant che Pinot grîs, Pinot neri, Chardonnay e Merlot. Te Posavje, in particolâr, si bêf il Cvicˇek, un vin tipic de zone, cun pôcs grâts di alcul e pluitost garp: il non Cvicˇek al vignive doprât tal Sloven antic juste par fevelâ di un vin garp. Te zone plui orientâl de Slovenie, tal Podravje, a son vignâi di Riesling, Traminer, Sauvignon e di Ranina, vin tipic dal puest. Come ca di noaltris, tal paîs nestri vicin si cjatin lis Stradis dal vin che a permetin ai turiscj di visitâ lis tantis cantinis di produzion. I Slovens a bevin cetante bire, almancul uns 40 litris ad an par om (gjavâts fûr i fruts). Lis marcjis plui innomenadis a son Pivovarna Laško, nassude tal 1825, e la Union di Lubiane, che si imbutilie dal 1864. I presits de bire a son ancjemò plui bas dai nestris. Dopo mangjât, dispès compagnât a cierts dolçs, si bêf il Slivovitz, un licôr a base di ciespis che però si bêf in dute la Europe centri-orientâl. Cuant che in Slovenie si fevele di aghe imbutiliade, si fevele di Radenska, la “aghe dai trê cûrs”, che e gjolt di une sorte di monopoli tal paîs. La sô storie tant che prodot mitût in cumierç e je tacade tal 1869.
A. P.

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +