Dirits e autoguvier, mobilitazions e conflits de Bretagne ai Paîs Catalans

L’Istât di chest an ator pe Europe al è segnât dal cjaldonon e dai burlaçs ancje pes mobilitazions e pai conflits che a tocjin i dirits linguistics e l’autoguvier teritoriâl, de Bretagne ai Paîs Catalans. Il prin event di cheste fate, ancjemò vie pal mês di Jugn, al è stât il scuintri tra lis autoritâts scolastichis francesis e lis scuelis associativis Diwan che a davuelzin lis lôr ativitâts didatichis daûr dal metodi de imersion linguistiche, doprant tant che prime lenghe il breton.
◆ L’argoment dal confront al jere chel dal ûs de lenghe proprie inte prove di siencis previodude pal diplome di educazion secondarie. Pal Ministeri de istruzion chê part dal esam e veve di jessi fate dome par francês, intant che sorestants e arlêf des scuelis Diwan a domandavin di fâle par breton. Al è stât une sorte di braç di fier che biadelore si à sierât cuntun risultât positîf a pro dai dirits linguistics di chei students. Cun di fat, juste doi dîs prime dal esam e dome dopo che i students a vevin fat savê che a varessin fat la prove par breton in ogni câs, ancje se chest al voleve dî jessi boçâts, al è rivât il vie libare di Parîs e il Ministeri ur à permetût di fâ l’esam di siencis inte lenghe proprie.
◆ Dongje de determinazion dai sorestants e dai arlêfs des scuelis Diwan, al à contât a pro de decision ministeriâl ancje il precedent di une deroghe compagne che e jere stade concedude aes scuelis imersivis in lenghe basche Seaska, che a vevin tacât a domandâle ancjemò tal mês di Març. Lis autoritâts scolastichis francesis a àn marcât il fat che in dutis dôs lis ocasions e je stade fate une ecezion, stant che par Parîs intes scuelis imersivis, pal esam di maturitât, si puedin fâ «intes lenghis regjonâls dopradis vie pal an scolastic» dome lis provis di storie e gjeografie, e di matematiche
◆ Però, intune circolâr ministeriâl dai 14 di Dicembar dal 2021 al è scrit che «i arlêfs che a àn fat un percors formatîf bilengâl a puedin fâ lis provis di maturitât inte lenghe regjonâl», cence specificazions o limitazions in cont des materiis. Par chel, il coletîf “Pour Que Vivent Nos Langues”, che al ten dongje diviersis entitâts che a son espression des comunitâts di lenghe minorizade dal Stât francês, al à tornât a domandâ al ministri pe istruzion che e vegni gjavade vie cualsisedi limitazion, par che tal 2024 ducj i arlêfs des scuelis imersivis a puedin fâ ancje lis provis di esam di siencis doprant ognidun la lenghe che e ven doprade vie pal percors didatic e formatîf. A pro dal lôr dirit ae lenghe e ae istruzion.
◆ Dongje di chê che in cualchi maniere si pues calcolâle une vitorie, vie pal Istât a son saltadis fûr altris cuistions cjaldis, griviis e penzis. Inte Comunitât autonome di Valencia, la clime e je fintremai preocupante, massime dopo des elezions autonomichis e aministrativis, segnadis di une polarizazion fuartonone e de afermazion dai partîts de diestre spagnoliste PP e Vox, che cumò a comandin in tancj comuns e ancje a nivel regjonâl. Un esempli dal aiar brut che al tire di chês bandis al è chel de decision de aministrazion municipâl di Borriana di gjavâ vie de biblioteche civiche une schirie di rivistis, che prime a jerin a disposizion dai citadins, dome par vie dal fat che a son par catalan. Cuintri di chê forme di censure e à cjapât posizion Acció Cultural del País Valenciá (ACPV), entitât une vore ative a pro dai dirits, de lenghe e de culture di chel teritori, e a son stadis inmaneadis diviersis iniziativis di proteste, che a àn cjatât la poie ancje di altris organizazions dai Paîs Catalans, tacant de “storiche” Omnium Cultural, che in Lui e à finît i siei prins sessantedoi agns di ativitât e che e je daûr a inmaneâ lis manifestazions pai 11 di Setembar, “Diada nacional de Catalunya”, ancje cul intindiment di tornâ a sburtâ dal bas il procès indipendentist. ❚