I dirits linguistics des minorancis in Letonie a son in pericul. Lu àn marcât cualchi setemane indaûr i esperts dal Comitât pai dirits umans de ONU cun riferiment ai mudaments ae normative che a àn puartât a limitâ la istruzion intes lenghis minorizadis in chê republiche baltiche. Tal mês di Setembar dal an passât, il Parlament de Letonie al à fate buine une gnove leç che e previôt che dentri dal an scolastic 2025-2026 lis scuelis bilengâls o a imersion in lenghe minorizade a varan di doprâ tant che lenghe di insegnament dome il leton. Pai esperts de ONU cheste normative e va cuintri des minorancis e ancje dai impegns internazionâi cjapâts de Letonie in cont de lôr tutele.
◆ Il câs de Letonie al conferme che in Europe e tal rest dal mont, in gjenerâl, la situazion des minorancis e va dilunc a jessi problematiche, cemût che al veve dit ancjemò l’an passât ancje il segretari gjenerâl de ONU, António Guterres. In cont di chest argoment, intune interviste saltade fûr ai 11 di Fevrâr stâts sul sît di informazion catalan ElNacional.cat, al à palesât chês stessis preocupazions ancje Fernand De Varennes, il jurist canadês che dal prin di Avost dal 2017 al è relatôr speciâl pes cuistions des minorancis li de ONU. «Magari in cualchi câs la situazion e je lade un tic in miôr, ma pe plui part des realtâts o scugnìn ricognossi che a son stâts fats plui pas indaûr che indenant» al à dit De Varennes, marcant che «o vin denant di nô une incressite dai discors di odi e des discriminazions cuintri des minorancis» e che in diviers stâts al va dilunc a cressi ancje il nazionalisim dominant che al ispire ategjaments e fintremai iniziativis politichis, legjislativis e judiziariis che a ridusin o che a dinein i dirits di fonde des minorancis.
◆ Intant che tra discriminazions a palês e azions implicitis di minorizazion la cuistion dai dirits linguistics e plui in gjenerâl di ducj i dirits fondamentâi e je grivie e penze, a son ancje gnovis interessantis in cont de promozion dal pluralisim linguistic e culturâl, in particolâr tal cjamp de produzion audiovisive e cinematografiche.
◆ La prime e je chê de candidature pal premi Oscar pai cines in lenghe foreste di “An Cailín Ciúin” (The Quiet Girl), il film in lenghe gaeliche irlandese dal regjist Colm Bairéad che al à za vinçût cetancj premis a nivel internazionâl, tacant dal Ors di cristal – ricognossiment de jurie internazionâl di Kplus – inte edizion dal an passât dal Festival di Berlin, dulà che l’Ors di aur lu veve cjapât la pelicule, di plante fûr dute par catalan, di Carla Simon, “Alcarràs”, che vie pal Istât dal 2022 e jere rivade ancje in Friûl, in programazion li dal Visionario a Udin, in gracie de colaborazion cun Suns Europe. La seconde e rive propit di Berlin, là che la edizion di chest an di chê che le clamin ancje “Berlinale” e viôt la presince di doi cines par galizian – “Matria” di Álvaro Gago e “Sica” de regjiste catalane Carla Subirana – e un che al è par euskara, par castilian e par francês: il so titul par inglês al è “20.000 Species of Bees”, al è une opare de regjiste basche Estibaliz Urresola Solaguren e al è in concors inte sezion principâl dal festival. La tierce e je chê de acuisizion de bande di Netflix, pe prime volte in assolût, di une serie tv par galês, “Dal Y Mellt”, che si podarà viodile dapardut ancje in lenghe origjinâl cui sottitui in diviersis lenghis, cemût che al sucêt bielzà ancje par altris produzions che a son par catalan, par basc e par galizian. Buinis visions europeanis. ❚