Sfuei Mensîl Furlan Indipendent
Archivi de Patrie

“Dio potente”: Il Teatri Stabil Furlan al celebre Renato Appi tai cent agns de nassite

Redazion
LA PRESENTAZION DI “DIO POTENTE”

Il spetacul al varà une programazion dople, a Cordenons e a Udin.
Cun di plui, si fasarà la tradizionâl taule taronde par anticipâ la serade

Renato Appi, par agns vicepresident de Societât Filologjiche Furlane e dal Ent Friûl tal Mont, al è stât dramaturc e poete, ma al è ricuardât ancje par jessi stât animadôr culturâl, studiôs e scritôr di grant nivel artistic e soredut uman. Tai cent agns de sô nassite, il Teatri Stabil Furlan al à decidût di celebrâ chest straordenari furlan cuntun spetacul teatrâl che al viôt tant che regjist il nevôt dal stes Appi, Andrea, component ben cognossût dal duet “I Papu”. Il test si clame “Dio Potente” e al è lât in sene a Cordenons, paîs di Appi, ai 28 di Otubar, e a Udin ai 29: e cumò al sares biel che ancje altris teatris de regjon a pontassin su chest spetacul che al fevele cun fuarce di une figure de culture furlane che no va dismenteade.
◆ A pensâlu a son in tancj, che si son dâts dongje intune operazion di valorizazion di cheste personalitât siore di aspiets interessants. Il Teatri Stabil Furlan cul so president Lorenzo Zanon al ocnsidere che «Renato Appi al è a vuê une des figuris plui rapresentativis de furlanetât dal Friûl Ocidentâl. Al à vût rûi istituzionâls impuartants, in plui di vênus lassât in ereditât une produzion artistiche une vore impuartante. In ocasion dai 100 agns de sô nassite, nus pareve dovût fâi omaç cuntun spetacul che al sarà bon di piturâ la sô figure, cetant significative pe lenghe e pe culture furlane. Cun cheste produzion o larin duncje a memoreâlu e, in graciis di lui, a valorizâ ancje il teritori li che al è nassût»
◆ Un teritori che i ten une vore, a ce che al dîs Loris Zancai Mucignat, assessôr ae Culture dal Comun di Cordenons, che al spieghe: «La prime di cheste rapresentazion e je stade l’event di ponte di une programazion anuâl – fate in graciis des associazions dal teritori – che la Aministrazion di Cordenons e à volût par celebrâ la figure di chest so concitadin preseât: un om che, sedi tal privât che te sô ativitât publiche, al à savût a puartâ la furlanetât e la “cordenonesitât” in dut il mont. Par chest, o ai la sperance che il spetacul al podedi superâ ancje i confins dal Friûl».
◆ Intal mont culturâl dal Friûl ocidentâl la figure di Appi e à vût une vore di pês. Maria Francesca Vassallo, presidente dal Centro Iniziative Culturali Pordenone, e marche che «Adun cun pre Luciano Padovese (fondadôr dal Centri culturâl Cjase Antonio Zanussi), e altris, Renato Appi si è impegnât par incentivâ la ativitât culturâl dal teritori. Lu à fat cuntun spirt simpri viert e propositîf. Al è stât duncje une persone fondamentâl pal nestri Centri”. Ma il so voli si è slargjât une vore plui inlà, come che al ricuarde Loris Basso, president dal Ent Friûl tal Mont: «Renato Appi al à simpri vût une atenzion particolâr pai emigrâts e pal lôr contat cu lis fameis e i Paîs di origjin, ancje se al veve tancj impegns come dramaturc, poete, ricercjadôr. Al è simpri stât interessât ai temis sociologjics de emigrazion e in particolâr al aspiet des lidrîs e de apartignince identitarie furlane. La “lontanance” tant che oportunitât di agregazion e je stade un teme in plui che al à leât i furlans sparniçâts pal mont. A son ideâi che Appi al à cjatât te sô ativitât tal Ent Friûl tal Mont, fintremai de sô fondazion, e po ancje come vicepresident, deventant un pont di riferiment pe comunitât furlane emigrade. Tal centenari de nassite al jere dovût fâi omaç cuntune schirie di iniziativis par puartâ ancje a ducj i nestris coregjonâi, intal specific aes gjenerazions zovinis, testemoneance vive de sô vite e de sô ereditât. La rapresentazion dal TSF e puarte insom il percors multidissiplinâr siôr che lu à fat deventâ di gnûf protagonist»
◆ Par rindi ancjemò plui vivarose e fuarte la testemoneance su Appi il tes al è stât afidât a so nevôt:
◆ «L’incuintri origjinâl fra Renato Appi e so nevôt Andrea nus à parût une sintesi perfete fra lis dôs animis artistichis di chest Teatri Stabil Furlan, simpri in ecuilibri fra tradizion e inovazion. Une celebrazion di un grant autôr dal passât cuntune fuarte cjalade contemporanie», al conte Massimo Somaglino, diretôr artistic dal TSF. E tirât a ciment, Andrea Appi, autôr e regjist dal spetacul, no si è tirat indaûr: «La sielte di bande dal TSF di comissionâ a mi un spetacul su Renato Appi e je stade une vore coragjose. Une scomesse – al siere – che e je tal stes timp, cemût che al sucêt dispès, une grande oportunitât, che o ai acetât cun entusiasim, ancje se la opare di gno barbe e je tant lontane dal gno percors artistic. Cul stes entusiasim, o invidi ducj i curiôs che a varan chê di vignî a cognossi Renato Appi om e inteletuâl di un pont di viste pardabon no comun». ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +