Spitzenkandidaten e manifest programatic, la ALE si prepare pes elezions europeanis dal 2024

Intant che a Udin e jere in vore la fase finâl di Suns Europe, il festival internazionâl des arts intes lenghis minorizadis, inmaneât de cooperative Informazione Friulana, la societât editore di radio Onde Furlane, cul jutori finanziari e cu la colaborazion di cetantis istituzions e entitâts di chenti e di diviersis altris parts dal continent, dai 13 ai 14 di Otubar a Strasburc si à davuelt il congrès de Aleance Libare Europeane (ALE). Pal partît politic a nivel european che al ten dongje la plui part dai partîts e dai moviments che si presentin tant che la espression plui autentiche des rivendicazions di ricognossiment e di autoguvier di minorancis, nazionalitâts e regjons e je stade la ocasion par fâ il pont de situazion ancje in preparazion des elezions pal Parlament European (PE) che si fasaran ai 6 e ai 9 di Jugn dal 2024.
◆ Inte citât de Alsazie si àn dât adun i rapresentants des cuarantetrê fuarcis politichis che a fasin part de ALE in chel che si pues calcolâlu tant che il prin vêr congrès de formazion politiche che e ten dongje autonomiscj, federaliscj e indipendentiscj, stant che fin cumò in passe cuarante agns di storie lis diviersis adunancis a vevin vût la struture organizative de assemblee gjenerâl. Vie pai doi dîs di lavôrs a son stât frontâts diviers argoments e al è stât fat bon ae unanimitât il manifest programatic pe competizion eletorâl europeane dal an chel al ven.
◆ Lis peraulis clâf de linie politiche de ALE pal 2024 – che si pues strucâle cul sproc “Europe par ducj” – a son cinc. La prime e je “democrazie”, cun riferiment ae incressite dai podês dal PE, de rilevance istituzionâl dai ents teritoriâi substatâi e de responsabilitât de Comission Europeane (CE), intant che la seconde e je “diversitât”, «un concet di fonde inte sôs diviersis dimensions», cemût che e à marcât la presidente de ALE, la basche Lorena Lopez de la Calle Aritzi. Dongje di chês a son ancje “sostignibilitât”, “solidarietât” e “prosperitât”, che a tocjin in chel istès sedi i setôrs de economie che chei de pâs e de sigurece.
◆ Il congrès al à ancje sielzût chei che a saran i “spitzenkandidaten”, lis dôs personis che la ALE e fâs indenant tant che candidâts pussibii pe presidence de CE e tant che rapresentants di ponte dai valôrs, dai principis e dai obietîfs dal partît politic a nivel european che al sburte a pro di autoguvier, sussidiarietât, diversitât e democrazie a ducj i nivei. L’acuardi al è stât cjatât su dôs personalitâts che a puedin jessi pardabon rapresentativis di une Europe “altre” e par chel “plui Europe”, “plui europeane” e “di ducj e par ducj”. A son la zovine ativiste de comunitât danese dal Länd todesc dal Schleswig-Holstein, Maylis Roßberg, esponente dal partît teritoriâl SüdScheswigsche Wählerverband (SSW), e l’economist e politolic catalan, Raül Romeva i Rueda, che al fâs part di Esquerra Republicana de Catalunya (ERC), za eurodeputât dal 2004 al 2014 e po ministri pai afârs forescj, pes relazions istituzionâls e pe trasparence dal guvier de Catalogne, che al è stât daûr de organizazion dal referendum pe indipendence dal 1n di Otubar dal 2017 e par chel al è stât ancje in preson.
◆ Intant dal Congrès a son stadis fatis buinis ancje diviersis mozions, par esempli in solidarietât cui curdis, cui armens dal Nagorno-Karabakh e cu lis vitimis israelianis e palestinesis de violence, dal terorisim e de vuere, sburtant par une iniziative europeane a pro dal dialic e de pâs, e al è stât fat ancje un omaç ae memorie de scozese Winnie Ewing e dal cors Max Simeoni, esponents impuartants de famee politiche de ALE, che a son muarts vie pal 2023. ❚