Il progjet de scuele medie su ce che al vûl dî “Jessi furlans e vê une lenghe”
No si siere cuntun finâl gaiarin il percors scolastic 2019-2020. Cundut che lis gnovis tecnologjiis a vedin stropade la buse de didatiche tradizionâl, di fat, no si pues dî che lis soluzions proponudis a vedin rivât adore a cjatâ il consens e la sodisfazion dai docents (che a lavorin plui di prime), dai arlêfs (cun diviersis dificoltâts di conession o di ricezion audio) e nancje dai gjenitôrs (che si cjatin a jessi pont fondamentâl inte triangolazion de DAD, o ben de didatiche a distance). Intal strucâ lis lezions intes scjaipulis dai schermis di un ordenadôr e je vignude a mancjâ une dimension fondamentâl dal insegnament, chê des relazions: il cjalâsi tai voi par gjavâ fûr i pinsîrs (e par capî se il concet al è rivât), il spazi di une batude, la cjarece di une peraule, o di un cidinôr, che si poie su la muse dal frut par confuartâlu o par stiçâlu. Dut si è ridusût a un calcul di timps, a discapit dai intervents e dai resonaments. Clare che in chest cori, no cate la passion e la buine volontât dai docents, il spazi dedicât ai progjets particolârs di là de programazion ordenarie, tant che chel de lenghe furlane, si è ridusût inmò di plui, par no dî che al è sparît.
◆ Par fortune, no dut al è lât in strucje, stant che cualchi professôr al à cirût di disfrutâ lis potenzialitâts dal furlan, doprant cheste materie tant che une mate di tirâ fûr dal mac par creâ un moment di straviament e di integrazion.
Al è ce che al è sucedût ai 14 di Mai inte lezion de prime B de scuele secondarie di prin grât dal Istitût Comprensîf di Forgjarie e di Maian, indulà che la cjarte zuiade e je stade propit matarane, stant che i canais si son cjatâts denant nuie di mancul che la professore Marta Ciaccola, membri precari de Academie de Blave di Mortean, miôr cognossude tant che Catine, la comiche furlane lucane cetant amade dal public nostran. Tra une ridadute parsot e une bocjade di maravee, i fruts, che a crodevin pardabon di seguî une lezion serie, si son lassâts menâ intun viaç ae scuvierte de musicalitât dal furlan, che cu lis sôs sfumaduris al rive a svicinâsi ai sunôrs di altris lenghis, tant che il spagnûl, il francês, ma ancje inglês (il furlan “isal aiar?” par inglês al podarès jessi intindût tant che “is a liar”) o todesc, fintremai a rivâ al arap o al cinês. Cjapant par riferiment i verps jessi e vê, di fat, la professore Ciaccola e à dât mostre dai insegnaments che jê stesse e à vût mût di imparâ in chescj agns a contat cui furlans. Osservazions che a insiorin la nestre lenghe (biele la spiegazion dal pronon “tu”, simpri ripetût dôs voltis par un sens di responsabilitât dai furlans), ma che forsit un di chenti nol varès mai notât, cence il jutori di une voglade rivade dal forest.
◆ Il progjet al è nassût di une idee des professoris Mariagrazia Molaro e Alessandra Pagnutti e al à cjatât subite la poie dal dirigjent scolastic Stefano Stefanel, che al à nasade la potenzialitât di chest intervent alternatîf, bon di meti adun nozions pratichis e divertiment (tant e sigurât). Pes docentis, ma ancje par Catine, e je stade une sodisfazion a viodi ducj i fantats cussì atents e pronts a intervignî. E, ae fin, la sorprese plui grande le àn vude i arlêfs cuant che la atore si è gjavade la piruche e e à disvelade la sô vere identitât.
◆ De scuele di vite, daûr dal bancon de ostarie, Catine e je duncje finide, ancje se virtualmentri, su la catidre. Pe ocasion e veve preparât fintremai un toc trap cui intercalâ furlans, di mût di coinvolzi ancjemò di plui i frutats, che a àn promovude ad implen cheste sô prime prove. La professore Marta Ciaccola e à za dade la sô disponibilitât par zirâ tes scuelis par promovi il furlan ae sô maniere: une ocasion di no pierdi, par lezions insioradis di bonspirt e cuntune pinelade plene di vite. ❚