Sfuei Mensîl Furlan Indipendent
Archivi de Patrie

Culture di condividi

Serena Fogolini

Cemût fâ scorte di events ai timps dal coronavirus

Un cidinôr al dîs plui di tantis peraulis. Cussì, e je stade cetant significative la sielte di no cjapâ dentri i ambients culturâi intai discors dai sorestants vie pai mês passâts (e pôc si à dit ancje sul teme de scuele, o miôr, pôc al è stât ce che si à capît di dut chel cjacaronâ confusionât). Inmò plui curiosis e discutibilis a son stadis lis sieltis des ativitâts che a varessin tornât a vierzi par primis, che a àn viodût tirâ fûr de goife, jenfri lis tantis pussibilitâts, lis librariis (decision statâl) e lis bibliotechis (ordenance regjonâl). Decrets saltâts fûr cuasi vie pe gnot (e tal câs des bibliotechis nol è un eufemisim), tant par “dâi une bocjade di aiar al citadin”, cence, al è clâr, nissun sclariment su lis liniis vuide di tignî par garantî lis misuris di sigurece. In chestis decisions, batiadis di cualchidun tant che populistis, si pues lei la vision stereotipade di cui che al intint chescj lûcs tant che magazen di libris di cjoli e puartâ vie, cence rindisi cont che in dì di vuê tant lis bibliotechis che lis librariis a son deventadis centris essenziâi pe culture, che no dome a dan acet a events ma, il plui des voltis, a son lôr stessis motôr di iniziativis e di ferment culturâl. E cussì, cheste idee che e basti une puarte vierte par fâ contents i utents e à cirût di ridusi il mont che al zire ator di scritôrs, atôrs, musiciscj e operadôrs culturâi a une scjatule di podê spalancâ e sierâ cuant che si vûl. Un satûl che cumò al à di restâ ben sigjilât, cui pipinots fers e cidins, a recitâ la part dal “al larà dut ben”, in spiete di tornâ in sene a straviâ il public. Fasint fente di dismenteâsi che chel che par cualchidun al somee un divertiment al è un mistîr di dut rispiet, che al da di vivi e che al compuarte straoris e gnotoladis di lavôr passadis a scrivi, a provâ e riprovâ une batude, a perfezionâ chel passaç che inmò nol convinç intune cjançon.
◆ Il mont culturâl, dut câs, no si rint, anzit, al è plui che mai ferbint, a dimostrazion che la art e je at di resistence e che e cjate simpri une maniere par spissulâ fûr viers la lûs, ancje e soredut cuant che si cîr di limitâle. Inte rêt a son tantis lis manifestazions e i events che a àn dade vôs a inteletuâi, teatrants e autôrs: dai apontaments dai cafês leteraris (tant che chel di Codroip), aes pontadis ae scuvierte dai tesaurs platâts intes bibliotechis (“Guarneriana on air”) o ator pal teritori (i “Viaggi digitali d’autore” di Pordenonelegge), ai prodots di caratar informatîf des realtâts museâls (tant che la “antologjie sonore dai scritôrs di Vile Manin e dal so teritori”), aes leturis par piçui (ancje in marilenghe, come chês proponudis di Docuscuele) e incuintris par grancj di bande di associazions (tant che “vicino/lontano on”) o dai stes operadôrs. Lis bibliotechis, dal rest, a àn cirût di vignî incuintri ae utence proponint il prestit digjitâl, indulà che nol jere pussibil rivâ cul prestit a cjase (proponût par altri ancje des librariis di Udin). Jenfri i libris plui cirûts, a saltin tai voi “La peste” di Albert Camus e altris saçs e romançs peâts a epidemiis (“Spillover” di David Quammen e “Cecità” di José Saramago).
◆ Tal mont dal teatri, invezit, un biel sburt al è rivât de iniziative “Io sono Mecenate” dal CSS (che sul sît al à ancje creade une aree video cu lis regjistrazions dai spetacui produsûts), cun intervents in direte Facebook (ma lis regjistrazions si puedin tornâ a viodi) di diviers artiscj e la pussibilitât, par privâts, aziendis e associazions, di dâur un contribût par sostignî il lôr lavôr. Di bande lôr, i stes artiscj a àn dade prove di altruisim, come che e dimostre la iniziative “A fâ ben nol è mai mâl”, par cure di un grup di musiciscj furlans che a àn creade une racuelte di fonts a pro de Union taliane lote ae distrofie muscolâr di Udin. La liste e podarès lâ indevant, ma il messaç al è avonde clâr: in timps di crisi la culture no si ferme, ma si condivît, a dimostrâ che une mascarute e podarà taponâ la nestre bocje, ma no la nestre voie di esprimisi. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +