Sfuei Mensîl Furlan Indipendent
Archivi de Patrie

La bataie di Silvia cu la FAO cuintri de fam tal mont

Erika Adami

E ven di Udin la consulente de Organizazion des Nazions Unidis pe alimentazion e la agriculture tai paîs plui puars

In Guinee i àn dât il bon acet cuntun bâr di salate, par condividi ce che a vevin di miôr; in Cueste di Avoli cuntune cerimonie de aghe, element preziôs e sacri, massime intal continent che di chel al è il plui seneôs, la Afriche. Manieris di saludâ che a dan di maravee a cui che al è usât dome a une strente di man (…prime dal Covid-19!), ma che Silvia San Marco, consulente de Organizazion des Nazions Unidis pe alimentazion e la agriculture – Fao, e à imparât a cognossi e preseâ tal cors des sôs missions in Afriche pal istitût che al vuide i sfuarçs internazionâi par vinci la fam tal mont e par scancelâ la puaretât.
◆ Silvia e je esperte di comunicazion pal svilup, ven a stâi e studie, te suaze dai progjets che si ocupe, la maniere plui eficace par comunicâ cu lis personis di mût di permetiur di rivâ a esprimi lis lôr aspirazions e preocupazions e di cjapâ part aes decisions che a tocjin il svilup e il cambiament sostignibii des lôr comunitâts. Ta cheste metodiche, fondamentâi a son la scolte, il dialic e la partecipazion di chei che la vecje scuele de modernizazion, te sô concezion paternalistiche dal svilup, cun decisions caladis dal alt, e classificave come beneficiaris dai progjets. Dome coinvolzint lis personis, lis comunitâts, i decisôrs politics – tacant dal bas, des necessitâts reâls -, si pues pensâ di promovi un mudament positîf, capint cuâi che a puedin jessi i ostacui tal cjapâ sù pratichis gnovis.
◆ «I progjets che a dan bêçs e vonde, no funzionin – e spieghe Silvia -. Tu âs di rivâ a costruî fiducie, capacitâts, competencis, che a àn di restâ tal timp, dopo che al è finît il progjet. La comunitât e à di fâlu so, parcè che e capìs che al è pal ben di ducj». E alore chel progjet tu âs di comunicâlu ben (tes lenghis locâls, che a son une sdrume, e proponint esperiencis di sucès) e par fâlu, tu âs di metiti in relazion cul ambient li che si opare e cu lis personis che li a vivin, tacant dai rapresentants des comunitâts. «In Afriche no ducj a san lei e scrivi, no ducj a àn la television o il telefonut, anzit. Tancj a vivin in puescj rimits, cence aghe di bevi ni corint eletriche. Cemût ju visistu dal censiment agricul che al sta par partî, dal fat che ur vignarà dongje int par fâur domandis? O ben, in ce maniere ju convincistu a doprâ tecnichis plui sostignibilis par coltivâ lis bananis, impleant colt naturâl e bandonant i velens chimics che i paris e i paris dai lôr paris a vevin imparât a doprâ? Cu la comunicazion dal bas – e sclarìs la consulente furlane de Fao -, fasint jeve sui canâi in vore, che no son dal sigûr i sîts web: des radios rurâls e comunitariis, cun spots e senutis, ae figure incjariade di pandi notiziis impuartantis tes comunitâts, dal teatri des marionetis ai grups di feminis che si cjatin in cualchi vile, passant pe aprovazion dal dean. Al è lui che ti da acet, che ti scolte e, cul so placet, al conferme la atendibilitât dal progjet. Diferent, me – femine blancje foreste – nissun mi scoltarès e la campagne di inviâ e falirès prime di tacâ».
◆ Ta chestis missions «nus compagnin, al vâl par me tant che pai miei coleghis, consulents dal Paîs li che o sin. Nol è dome par un fat di comunicazion, ma ancje sociologjic. Tu âs bisugne di vê dongje cualchidun che al cognossi lis dinamichis dal puest», parcè che la Afriche e à mil musis. «E je un continent che al à grandis potenzialitâts, siôr di risorsis minerariis, sfrutadis di grups piçui, par solit une vore corots, che lis vendin ai forescj, talians includûts. E paie il presit dal colonialisim e di un mût di fâ cooperazion che al puarte bêçs, ma nol lasse nuie cuant che i bêçs a finissin. Il divari tra zonis rurâls e citâts al è une vore fuart» cu lis citâts che a stan deventant motôr di svilup, ma cuâl svilup? Dal sigûr, il procès svelt di urbanizazion al à puartât a «tas di incuinament une vore alts, ma ancje a une impenade di infarts e malatiis cardiovascolârs, in plui che de obesitât, par vie di une alimentazion diferente peade al consum di mangjative no sane, massime confezionade, ufierte un pôc dapardut». Problemis che no si fevele, parcè che «la Afriche, tai voi de plui part de int, e reste il continent dai fruts cu la panze sglonfe – e dîs Silvia -. A son fruts che no àn di mangjâ, altris che a fasin un past complet dome a scuele. E je une realtât che e slambre, ma o lavorìn propit par mudâ lis robis».
◆ Ciert, la imagjin di une Afriche rurâl, fate di vilis, casons e stradis di tiere batude – cence une inversion di tindince -, in curt e sarà sostituide di une Afriche epicentri de urbanizazion globâl. La stime des Nazions Unidis e je che il tas di urbanizazion al rivarà al 50% tal 2030 e dongje dal 60% tal 2050, cuant che la popolazion dal continent e sarà la plui grande e la plui zovine dal mont. E propit i zovins e cjale la Fao par fâju deventâ protagoniscj de agriculture africane dopo agns segnâts des coltivazions estensivis e monoculturâls, de svendite di terens aes multinazionâls e dal conferiment dai prodots ai monopoliscj de grande distribuzion, cirint di rinfuarcî lis organizazions di contadins a nivel familiâr e la lôr capacitât di colegâ soluzions gnovis cu la tradizion e lis cognossincis locâls.
◆ «Dentri de Decade Onu de agriculture familiâr, screade l’an passât, o stin sburtant suntune agriculture naturâl e sostignibile, diversificade ancje par rispuindi miôr ai cambiaments climatic. O cirìn di fâ capî aes gnovis gjenerazions che al conven lavorâ ta chest setôr, che al pues rindi e che si varà simpri bisugne, scoragjantju dal scjampâ tes citâts o viers Paîs forescj. Nol è facil, a son temis che a àn di jentrâ tes agjendis politichis. De bande nestre, pal svilup di pratichis agriculis sostignibilis si fidìn une vore aes scuelis sul cjamp pai contadins, li che une trentine di lôr si cjate cun regolaritât, dilunc de stagjon agricule, par individuâ problemis comuns e cjatâ soluzions cul jutori dai insegnants: un sisteme partecipatîf fondât suntune cognossince decentralizade, bon di dâ rispuestis adatadis aes esigjencis locâls». ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +