DIBATIT LETERARI. Friûl tradît

“Il Friûl al à di saltâ fûr dal taramot cul cjâf e no pai pîts”. Cussì al diseve pre Checo Placerean subit dopo dal Taramot dal 1976 e simbul di chest “saltâ fûr cul cjâf” e fo cence dubi la Universitât dal Friûl. Ma chê Universitât dal Friûl che tai ideâi di pre Checo, ma ancje dai tancj furlans che a àn scombatût par vêle e che a àn gjoldût cuant che te leç pe ricostruzion (câs unic in dute Italie) e je stade metude dentri ancje la istituzion de Universitât, che e veve di jessi l’imprest pe rinassite dal Friûl taramotât ise pardabon chel “cjâf” che al à di vuidâ i furlans o ise une des tantis universitâts talianis che si è cjatade a nassi “al confin dal imperi”?
Magari cussì no, a distance di passe trente agns o pensìn che un belançut si podedi fâ. E no si riferìn a la operazion matematiche di fâ cuadrâ i conts. Sigûr e pues jessi une braure dimostrâ che ancje se o vin un Ateneu sotfinanziât si rive distès a mandâ indevant la barache. Di chest o rindìn mert al Magnific Retôr prof.e Cristiana Compagno. Ma no nus baste. Come che no nus baste un “master” ogni tant, e par di plui finanziât di un ent esterni. E varès di jessi primarie competence dal Ateneu meti in calendari cors costants di lenghe furlane. Par ducj e par ducj i nivei.
Massime cumò che la scuele e varà di frontâ il prossim an scolastic cul insegnament de lenghe furlane come materie curicolâr, si palesin in maniere dramatiche lis mancjancis fin in dì di vuê ingrumadis di bande di une Universitât che no à mai vût une catedre fisse pal insegnament de nestre lenghe e de nestre culture. Cence jentrâ tal specific de formazion dai insegnants furlans, pussibil che un student di inzegnerie o di medisine nol vedi la pussilitât di fâ un corsut base par imparâ a lei e scrivi par furlan?
Tant di cjapiel a int come il prof. Giovanni Frau o la prof.e Silvana Schiavi Fachin che tai agns a àn fat salts mortâi, ma une serie programazion formative no pues restâ leade a la fuarce e la volontât dai singui. Anzit cumò si cjatìn professôrs come Franc Fari che intune interviste al declare che la lenghe furlane “no varès di jessi imparade cul insegnament scolastic” e che dutis lis regulis su grafie e gramatiche a son dome di intric.
Noaltris o stimìn il prof. Fari e cun plasê lu ospitìn su lis nestris pagjinis cuntune gustose riflession su la Bibie, ma no nus à plasût cheste jessude suntun setemanâl furlan cence jessi po smentide.
No vin voie di butâ la crôs intor ai singui, i problemis de Universitât dal Friûl no son colpe dal prof. Fari. Ma o regjistrìn chest ritart, chest obietîf mancjât, anzit par noaltris un vêr e propri tradiment des motivazions fondativis de nestre stesse Universitât dal Friûl. ■
Redazion