Sfuei Mensîl Furlan Indipendent
Archivi de Patrie

DI SCJAS IN SCJAS: I TARAMOTS INTE STORIE FURLANE. An 998: “Mil e mai plui mil” al devente cuasi vêr

Agnul Floramo
Pituris te Basiliche di Aquilee
Taramot
Taramot

Une vôs tremende, come chê di une bestie infernâl, che e rimbombave pardut, fasint disperâ oms e animâi di cjatâ une pussibilitât di salvece e fo sintude par dute la plane, sù fin tes monts. Ancje Vignesie, la Istrie, il Canâl di Tulmin a forin scjassâts. I muinis de Badie di Rosacis lu segnarin sui manuscrits de lôr Croniche tant che un grant e tragjic event di tramandâ ae memorie dal om.
Ma soredut Aquilee, intal An dal Signôr 998, e fo colpide cun grande crudeltât di une man spietade e paurose, tant che la lidrîs antighe de basiliche e fo sledrosade, cun grant sgrisulâ dai mosaics, dai paviments antîcs, des colonis, des muracis. Jone cu la sô barcje al fo invistût di une onde maligne mai viodude prime. Ancje i segnâi de antighe potence di Rome si sdrumarin par tiere intun grant cjalderon di polvar e di patùs.
Che e fos stade duncje vere la profezie de Bibie di Jerusalem, là che Sant Zuan, rapît de plui misteriose vison su la isule di Pathmos al predicjave la Apocalìs, il Montafin, il Boboròs? I segnâi pandûts intai mes prime a someavin dâi reson a cheste tremende veretât: Og e Magog, cu la muse sassine dai Ongjars, a jerin bielzà jessûts des puartis di Orient, de Tatarie, ven a stâi dal Tartarus infernâl, a jerin rivâts fin in Friûl, maçant, copant, brusant e puartant vie dut ce che a podevin, lassant daûr di lôr dome che fam, muart e miserie, vâl a dî chei trê spirtats che insiemi cu la peste ogni tant a corin pes contradis di chest mont, preparant la vie al Anticrist.
Epûr il Patriarcje Massenzi (811-837), nancje un secul prime, al veve ripuartade la sede dal Patriarcjât di Cividât inte antighe citât, in gracie de volontât dal imperadôr Carli il Grant che al assegnave a bon pro di chel sant om, di lui cetant stimât e preseât, i confins di une des diocesis plui grandis di Europe: e par festezâ l’event di cheste gnove Aquilee, a meterin mans a une revision de grande basiliche, splendôr de citât, miracul di bielece e di sapience: a tirarin sù il puarti, la glesie dai Paians, il transet, a sgjavarin fûr la cripte sot dal presbiteri, fasintle bielissime cun chês pituris che a cjantavin la potence di Sant Marc, l’Evangjelist, e di Ermacore, il prin Sant. Ma si sa ben che i calcui dai oms no son mai chei dal Signôr, e dut ce che nô o pensìn, o progjetìn, o sperìn, al ven dispès metût in zûc intun moment.
Ma nol è mai un mâl, come che nus contin i vecjos, che nol sedi ancje un ben. Il colp de Bestie i darà la pussibilitât ai Patriarcjis Zuan IV (984-1019) e al so sucessôr Wolfgang von Treffen, ven a stâi Popon (1019-1045), di progjetâ une basiliche gnove, in linie cu lis grandis glesiis romanichis imperiâls. Ai 13 di Lui dal 1031, il gnûf templi al sarà consacrât cun tant di grant cjampanili, chê tor cuadrade in scuare no dome cu la tiere, ma ancje cuntune vision di une Patrie rinovade, moderne, buine di pandi bielece e culture in dute Europe, di Regensburg a Praghe, di Viene a Zare. Un model Friûl insome, resurît de pôre e de disperazion.
Us contial alc di gnûf? ❚
✒ Agnul Floramo

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +