Si disial Bélice o Belìce? Aromai no lu san plui nancje i sicilians.
I media talians corûts in zone par documentâ il taramot dal ’68 a àn scomençât a clamâlu “Bélice”, e di chê volte ancje i locâi a àn cambiât il non de proprie val, in barbe ae toponomastiche autoctone di “Bilìci”. Al capite ancje di sintî pronunziâ “Frìuli” al Tg1, ma no si pues dineâ che in gjenerâl l’efiet mediatic dal taramot furlan al è stât chel di fâ scuvierzi ai talians che la trincee sgjavade dilunc dal front orientâl e jemplade di casermis (parcè che cussì al jere calcolât chê volte il Friûl: une tiere di nissun, di butâ in bocje ai invasôrs), no jere disabitade. Al jere a stâ invezit un popul particolâr, che al fevelave une lenghe dute sô e che al veve un mût propri di reagjî aes disgraciis, che a fossin une vuere o un taramot.
Ma al è forsit ancje plui impuartant osservâ che no dome i talians a àn scuviert il Friûl, ma che i furlans a àn scuviert se stes.
Intal intervent precedent o ai contât cemût che in chei agns i studiôs si interessassin al câs Friûl par contâ un model particolâr di disvilup che, lontan dal imponi une modernitât fate di proletarizazion, dislidrisament e abandon des campagnis, al smicjave anzit a integrâsi cul tiessût urban e sociâl premoderni. Lis piçulis buteghis artesanis si son evoludis in distrets industriâi e in fabrichis di grandece piçule e medie, e chest al è sucedût – chest element nol va dismenteât – soredut par vie di une compression salariâl che e à fat in maniere che di râr al aument de produtivitât si acompagnàs un aument adeguât dal podê di acuist dai lavoradôrs.
Al è chest un presit no di pôc che a pain i furlans, ma ae fin dai agns ’60 si scomence a viodi calâ la grande emigrazion, e a tachin ancje lis primis tornadis dal forest.
I operaris, ancje se tra mil dificoltâts, sotpaiâts e sorecjariâts di lavôr, a restin intes lôr cjasis contadinis. I oms a deventin “metal agricultôrs”, lant in fabriche dopo vê guviernadis lis bestiis, e a convertissin lis feriis in permès dilunc dai periodis de semine e des racueltis. Lis feminis a dedichin une part dai gjalinârs ai cavalîrs, di vendi ae fabriche, o si dedichin al lavôr a domicili.
Se si esamine la vite dai borcs e dai piçui paîs distruts ai sîs di Mai, si puedin individuâ elements ricorints che a testemonein il costum di gjestî in maniere coletive bens comunitaris, che nol pues no riclamâ ae ment lis antighis viciniis. Dispès la mape di un borc e pues jessi stilizade cun liniis che a van de glesie ae ostarie, de fontane ae latarie, des corts aes placis. De fin dal Votcent, propit lis latariis sociâls a acuisissin un rûl socioeconomic di prin plan. Fin a pôc prime dal taramot, in cuasi ogni cjase e jere almancul une vacje. Ducj a conferivin il lat ae latarie e a fasevin il propri turni a judâ il fedâr. A chestis, dispès a jerin conetudis altris struturis comunitariis tant che i asîi (no statâi o comunâi, ma dal dut autogjestîts!) e i locâi de sagre.
E ven fûr cussì la trame di un tiessût sociâl orizontâl conetîf là che i leams solidaris si fondin e si fuartecin inte cogjestion dai varis spazis e des risorsis coletivis. Al è par chest che cuant che i viei a contin dai minûts dopo il taramot, al salte fûr che al è vignût “spontani” dâsi une man un cun chel altri. “Spontani”. Al è come cuant che tu i domandis a un muredôr “ma cemût fasistu a butâ sù la malte in chel mût?”. Mighe tal sa sclarî. I ven “spontani” fâ cussì, parcè che al è il so braç che – dai e dai – al à memorizât cence savê il moviment. E alore tu capissis che “spontani” nol è sinonim di “naturâl”, ma al descrîf invezit un compuartament cussì interiorizât che no si visisi di vêlu imparât.
E cussì, la autogjestion des tendopolis e la resistence a ogni element che al menaçàs la comunitât a son vignûts “spontanis”. Ma di chest o tratarai plui indenant.
Par cumò mandi, e un pinsîr a Giulio Regeni, un che nol à vût pôre di cirî. ❚
✒ Igor Londero – Autôr di «Pa sopravivence, no pa l’anarchie» Forme di autogestione nel Friuli terremotato: l’esperienza della tendopoli di Godo (Gemona del Friuli)
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +