Sfuei Mensîl Furlan Indipendent
Archivi de Patrie

DI SCJAS IN SCJAS: I TARAMOTS INTE STORIE FURLANE. 1348: il taramot che al cambià il paissaç

Agnul Floramo
Piture sul taramot dal 1348 di M. Wurmster di Strasburc (Boemie, 1362 cirche)
.

Ai 25 di Zenâr dal 1348, a ore di jespui, trê scossis, une di avertiment, chê altre paurose, la tierce devastante, a àn trasformade la Patrie intun grum di fruçons. Probabilmentri chest al è stât il plui orent di ducj i Orcolats, chel che adiriture al à cambiade la muse dal paisaç de nestre Tiere, che par cuarante dîs e je stade tribulade di continui, cence remission, di un tremâ cence sperance di polse. Giovanni Villani, l’innomenât scritôr di contis contemporani dal Boccaccio, nus regale inte sô famose Croniche un cuadri cetant realistic e precîs, magari strambotant i nons dai paîs che lui nol cognosseve e scrivintju come che lis letaris dai siei corispondents ju ripuartavin.
Cussì al dîs che in Silici (Sacîl), la puarte di piere de citât, chê vierte a soreli jevât, in direzion dal Friûl, e jere stade sdrumade intun fruç. A Udin, une buine part dal palaç dal Patriarcje si jere crevade, e cussì tantis altris cjasis intal cûr de citât, cun grande coparie di int.
A Sant Denêl, il cjistiel al fo dal dut scancelât, e cun lui tancj oms e feminis dal paîs. Ancje a Ruvigne, dôs toratis dal cjistiel a rondolarin jù fin dentri de aghe dal Tiliment. E dut chest cun grant stragjo di int. Come simpri, Glemone e fo la plui tampiestade de furie, scuasi che un destin crudêl le peàs a ducj i taramots de Storie: il cjampanili de Catedrâl si vierzè par lunc, come chel di Vençon, nancje che a fossin stâts çocs di len spacâts di une manarie; e chel zigant di piere di Sant Cristoful, simbul di une religjon antighe dute peade ae ritualitât di Aquilee e sculpît tal cret vîf te façade de glesie, si crevà dal cjâf fin ai pîts.

In chest document, a son scrits nons di cjistiei che o vin pierdude la memorie, scancelâts par simpri: Lemborg, Dorestagn, Destrafitt. Lemborg in particolâr, intes monts, al vignì ju par dîs miis lontan di dulà che al jere stât tirât sù. Villani nus conte ancje di une grande mont che e fo crevade tal mieç e lis franis a platarin par simpri la strade che e coreve ai siei pîts. La impression e fo cussì grande che la int e pensave che e fos dongje la fin dal Mont. E cussì tancj pecjadôrs, e massime i usuraris, nus conte l’autôr florentin, a fasevin publiche dimostrazion di pintiment, scancelant i debits a ducj chei che a vevin cjolte monede di lôr. E a jerin lâts indevant a fâlu par setemanis, segnâl che a vevin la code bagnade.
Ma la pôre no jere finide, dal moment che cualchi mês plui tart e rivà ancje une pestilence furiose, la stesse che un an prime e jere tacade in Crimee e che cumò e devastave la popolazion europeane: la Muart e coreve vie pes nestris borgadis cjapant sù chei puars che a jerin scjampâts al Orcolat. Il  patriarcje di chel timp al jere il grant Bertrant di San Genese, probabilmentri il plui grant riformadôr de Patrie, che al stave progjetant pal Friûl un Stât moderni, gnûf, ae altece dai grancj stâts nazionâi che a stavin nassint tal cûr de Europe. Par nô furlans e je stade pardabon une fortune che in chel moment tant disgraciât al fos propit lui sentât su la catedre di Aquilee.

Il 1348 al sarà propit l’an che bertrant al stimolarà une rinassite artistiche mai viodude prime, stiçant il grant Vitale da Bologna e la sô oficine creative, cul compit di puartâ bielece li che prime e jere stade dome che distruzion. E cussì, in dute Europe plui che l’an dal Taramot chest al vignarà ricognossût tant che la Vierte dal Gotic furlan, ispirât a une impronte realistiche fuartone, tant intes pituris che inte sculture.
E no dome inte citât di Udin, li che il Domo al devente cuasi la bandiere di une ricostruzion peade ae identitât de Fede, ma ancje vie pai piçui borcs e pes contradis plui scuindudis, in Cjargne tant che inte Basse. Il bon Patriarcje al torne a dâi un grant impuls aes plêfs, che lui al considerave plui impuartantis dai cjistiei.

E par tornâ a meti in sest lis lidrîs, savoltade dal grant scjas, Bertrant al puartà al so splendôr il cult antîc di Ermacore, chel Macôr che al varès dât, tant che aghe risultive, une gnove resurezion al popul. Ma si sa, i oms a fasin plui dams de Nature. E la arcje maraveose sculpide par conservâ lis relicuiis di Ermacore e Fortunât e sarès stade la ultime cjase di Bertrant, copât su la Richinvelde intal 1350 di un trop di feudataris che salacor no ur plaseve chel Friûl diferent, nassût dai rudinaçs e dai siums di un vecjo visionari e sant. ❚

✒ Agnul Floramo

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +