Sfuei Mensîl Furlan Indipendent
Archivi de Patrie

AUTONOMIE. Tornâ a pensâ la Europe intune clâf di rêts locâls

Walter Tomada

Alore pensâ al guvier dal Friûl “di bessoi” aial un sens e un valôr o ise dome une utopie? La persone ideâl par sierâ la schirie di intervistis che nus àn viodûts impegnâts par dut il 2012 a tamesâ la possibilitât di une vision origjinalmentri furlane e “autonomiste” tal sens plui alt dal tiermin al è Giorgio Cavallo: un che al à tocjât la ere dai partîts talians, jentrant in consei regjonâl par 15 agns tes filis di “Democrazia Proletaria”, po al è stât dôs voltis cjâf di une des plui impuartantis realtâts ambientalistis in Regjon, “Legambiente”, e intant al à ancje cjatât il timp par jessi par dîs agns assessôr de zonte di Sergio Cecotti al Comun di Udin.
Giorgio, se Lui si sveàs une dì intun Friûl che dut un colp al è deventât indipendent, crodaressial o i somearessial dome un sium?
No sarès une sorprese. Cjalait ce che al sta capitant ator pe Europe. No soi dome jo che o viôt sfantâsi in dut il vieri continent la soliditât dai Stâts europeans che a son deventâts masse debii par resisti aes ondis de globalizazion. Di front ae constatazion che lis decision politichis e economichis veris a vegnin cjapadis inaltrò, e che i Stâts a àn za scomencât di fat a pierdi sovranitât, in tantis areis di Europe no si viôt plui la reson par tignî in pîts chestis realtâts. Nol è dome un câs: la Catalogne e je dongje a un moment di svolte, la Scozie e vûl la indipendence e il Gales e lis Flandris a son in moviment pes stessis resons.
Duncje al è un procès di disgregazion a nivel european…
I segnâi a son clârs, il dissen di Europe che 200 agns indaûr al è vignut indevant cu la definizion dai Stats nazionâi al è in crisi. Ma ocjo a no pensâ che la rispueste e vegni dome di Stâts plui piçui. Al covente cjalâ ancje a ce che al sucêt in Slovenie, une Republiche masse piçule par sostignîsi di bessole. Fin cumò le àn tignude in pîts i contribûts europeans, ma in chest moment la crisi e sta sclopant tes stradis, la int e je sfiduciade e no va a votâ e chei che a votin a gambiin lis maiorancis in bloc. L’avignî nol è tai Stâts mignon, ma tes Regjons che si metin in relazion tra di lôr e cu la Europe. No esistìn di bessôi… in dì di vuê sierâsi nol à sens.
Ma la Europe rivaraie a jessi un pont di riferiment par chestis regjons?
In chest moment no somee, come che invezit ducj a speravin, un esempli di ricostruzion democratiche di un imperi che e je buine di regalâ cualitât de vite e coesion sociâl. Ma al è il puest tal mont dulà che l’aspiet sociâl al è plui impuartant.
In chest mont globâl ce sens aial fevelâ di identitât?
La identitât e à tantis musis. Culture, lenghe, paisaç, modei di antropizazion nus fevelin su ogni teritori di une peculiaritât che e po jessi coltade o bandonade tal non di altris modei. Si fevele di solit di une Europe che e vûl globalizâ dut, e che e sburti dome viers de internazionalizazion e de delocalizazion: ma inte Agenda Teritoriâl 2020, che al è un dai documents di fonde des politichis de Union, si dîs in maniere clare che no bisugne fidâsi dal sisteme globâl de economie, ma anzit si scuen cirî di crea un marcjât locâl.
Parcè?
Parcè che si à capît che une part des ativitâts economichis e dai servizis e po judâ i sistemis teritoriâi se e ven esercitade culì, e no a miârs di chilometris di distance. I scambis a son impuartants, ma la sigurece dai sistemis e je plui decisive. Cence sierâsi o fâ barieris, si pues capî in maniere intuitive cemût che cui che al prodûs energjie di bessôl e al gjestìs in autonomie i servizis in rêt, lis politichis pe cjase e la produzion alimentâr, al è plui libar e sigûr di parâsi dai guascj des crisis globâls. La identitât e je duncje un supuart di fonde pe costruzion di un avignî ecuilibrât, ancje in economie.
In ce maniere chest podaressial aplicâsi al Friûl?
In Friûl, se si vul pardabon jessi autonims, al coventarès tornâ a cjapâsi su la grope no dome il control de fiscalitât, ma ancje chel dal credit che tai agns ’90 al è scjampât lassant dome il Credit Cooperatîf a marcâ il teritori. Ma cence beçs, al è dibant fevelâ di iniziativis e di autonomie. Dut câs, intun moment dulà che la specialitât e je in pericul, la fuarce di une idee vere di autonomie e larès scrite neri su blanc intun gnûf statût. ■
Walter Tomada

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +