Lis vacjis e lis bandieris zalis cu la pale de Coldiretti a àn fat il zîr di Italie tes setemanis passadis. La manifestazion organizade par sensibilizâ la int sul pericul de invasion di lat forest a presits rots e je coventade par riclamâ la atenzion gjenerâl suntun setôr, chel dal arlevament, che in Regjon al continue a patî un grum. Par une volte, la Cjargne e je metude un tic miôr dal rest dal Friûl e a confermâlu al è un dai principâi arlevadôrs dal teritori, Claudio Peresson, che al gjestìs une aziende agricule a Darte e che al è il president de Latarie sociâl Val Bût di Sudri. “Il dât che al da subit la idee de situazion favorevule al è chel sul presit dal lat paiât al produtôr”, al spieghe. “Ca sù di noaltris o sin rivâts a garantî un presit base dongje dai 50 centesims al litri, cuant che invezit tal rest dal Friûl al ven paiât 35-36 centesims”. Cemût mai cussì tante diference? “Parcè che noaltris, in gracie de latarie che e je une cooperative, o rivìn a contignî lis spesis e a ricevi plui util che dopo al ven ripartît a ducj i socis. Un sisteme che al funzionave timp indaûr ancje cu lis Latariis Furlanis e che dopo al è saltât, cemût che o vin viodût, probabilmentri parcè che i arlevadôrs di là jù, sbaliant, si son fidâts di personis che di agriculture a capivin pôc o gran. Un tic ce che al è sucedût te Coopca: cuant che si devente masse grancj no si pues metisi in man di int che no à esperience manageriâl adate a competi cul marcjât”.
In dì di vuê, par fâ numars grancj, la latarie di Sudri e cjape il lat dai arlevadôrs di mieze Cjargne, di Paulâr a Tumieç, di Lauc a Mueç, e naturalmentri di dute la val de Bût ,di Darte a Paluce. A son 100 i cuintâi di lat che a vegnin messedâts in medie ogni dì, di chescj dome 20 a rivin dal comun di Darte dulà che e je la concentrazion plui gruesse di aziendis zootecnichis. A son cinc in dut, su 100 etars complessîfs, e “paradossalmentri – al fâs notâ Peresson – o vin plui vacjis di 40 agns fa cuant che invezit a jerin 150 arlevadôrs in dut il paîs.
Oltri a Sudri, chê altre grande latarie e je chê di Denemonç: ancje culì si tocjin i 100 cuintâi di lat in dì, discjamâts de Val dal Tiliment, dal Cjanâl di Guart e dal Cjanâl Pedarç. In dute la Cjargne a son cirche 200 i arlevadôrs in ativitât, che a molzin sù par jù 2.000 vacjis, e 40 malghis.
Al baste un paragon storic par fâ capî cemût che i timps a son cambiâts: “Cuarante agns fa – si impense Peresson – o vevin 20-30 mil vacjis in dut il teritori”. No si pues pensâ di tornâ a chei nivei, ancje parcè – e chi e rive la seconde sorprese – i numars dal setôr, daûr di chel che a disin i direts interessâts, a son stabii e juscj. La uniche criticitât e ven dal fat che la presince di arlevadôrs no je omogjenie: “Rispiet a une volte, a son comuns dulà che di vacjis no si ’nt viodin plui – al spieghe Peresson – e chest al devente un probleme pe cure e pe difese dal paisaç, cu la vegjetazion che e rive fin sot lis cjasis e il bosc che al glot i paîs. E fâs ben la presidente Serracchiani a pontâ sul recupar dai terens bandonâts, po dopo al volarès almancul une aziende in ogni comun”.
Altre cuistion, chê des stalis. Propit in chestis setemanis, la Comunitât di Mont e sta ultimant i bandots pes gnovis stalis di Sudri e di Preon, progjets pensâts adiriture 15 agns fa. “Come simpri, la politiche e rive masse tart”, si fâs notâ in Cjargne, e in dì di vuê la realizazion di chestis struturis no je plui prioritarie. “Se si vûl permeti al sisteme di continuâ a resisti – al siere Peresson – a coventin judâts chei che a fasin chest mistîr di une vite e che a stan cirint di tirâ sù i zovins. Ma par fâlu, al vûl garantît un redit fuart, se no un mulet al continuarà a cirî lavôr in fabriche, dulà che magari il sabide e la domenie no si lavore e si cjapin i stes bêçs”. ❚
David Zanirato
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +