Davoi su la Fieste de Patrie

Di solit, lis fiestis di popul a nassin dal bas e a sublimin un sintî comun, une partignince di là des divisions, un alc che al meti adun. Cussì, la cjosse che la Regjon a ves ricognossût uficialmentri la date dai 3 di Avrîl tant che fieste de Patrie, sul imprin e je stade saludade di tancj tant che un just ricognossiment spietât di agns. Po si è metude tra i pîts la politiche regjonâl e i partîts, che fintremai te dì prime a cjalavin chê date cun distac seren. Un mût par puartâ tal cavîl ce che si faseve in sante pâs. E duncje: disfâ. Rompi i cits. A ’nt vin letis, di ca e di là, di ducj i colôrs: “Che e deventi une zornade par dute la regjon: une fieste regjonâl”, cualchidun al à proponût dai scagns dal Consei di Plaçâl Oberdan. “E i triestins, dulà ju metìno?”, ur àn rispuindût. “E i pordenonês?”, ur àn ribatût, come se lis edizions de Fieste dal Friûl no si fossin mai davueltis di là dal Tiliment. Discussion e votazion in aule ai 17 di Març par chel pachetut che midiant di chel il stes Consei al organizarà la fieste, finanziaments e studis a associazions, ricercje sul Autonomisim, manifestazions varis. Jenfri aprovazions bipartisan, tentatîfs par ritocjâ di ca e di là, butant dentri chel e chel altri, inagant il spirt origjinâl de stesse fieste, la nestre politiche e à fat ce che e sa fâ di miôr. Fossie stade cidine, o varessin vude une fieste in plui sul calendari e mancul stupidets di sintî. Parcè che, cemût che al diseve pre Checo Placerean, “cuant che une idee e je biele, il podê al prin colp al cîr di copâte; se nol rive, al cîr di comprâte; se nol rive ancjemò no, le fâs so e le smamìs”. Al moment o sin te fase doi. ❚
✒ Oscar Puntel