I avigniments che a son sucedûts prime de ete patriarcjâl, soredut chei che le àn caraterizade, a son leâts a strent cu la citât di Cividât.
La nassite de nestre societât moderne e cjate la fonde in chel timp, dulà che podê civîl, religjôs e feudâl si son confrontâts ancje in maniere violente prin di cjatâ un ecuilibri (che purtrop al torne vuê a jessi in pericul seri!).
Il non di Cividât, propit par chel che al è stât produsût in chei timps, al è stât scrit te Liste dal Patrimoni mondiâl dal UNESCO.
Lis bielecis de nestre citadine a saran pandudis ator pal mont intîr inmò di plui, stant che, in ocasion de ESPOSIZION UNIVERSÂL di Milan, la Rai e mandarà in onde un cicli di documentaris, dulà che Cividât e je stade sielte par rapresentâ il patrimoni artistic e culturâl de nestre Regjon. Chestis bielecis a son prin di dut chês conservadis tal museu dal Domo, lis colezions dal museu Archeologjic Nazionâl e il Templut Langobart.
Cividât e deventà sede dal Patriarcjât tor il 737, cuant che il Patriarcje Calist al decidè di trasferîsi di Cormons. I Langobarts, rivâts tal 568, a vevin bandonade la religjon ariane, si jerin fats catolics e tal ducât di Cividât al jere stât mandât Ratchis, fi dal re, che al dimostre trop che al jere impuartant e strategjic il teritori. A forin edificâts in chê ete la Basiliche, il Batisteri di Sant Zuan Batiste e il Palaç patriarcjâl. I sgjâfs archeologjics nus àn tornât dome pôcs rescj, che dut câs a son i manufats plui rafinâts de sculture langobarde: il Batisteri di Calist e l’Altâr dal duche Ratchis. La citât e fo la residence dai Patriarcjis fin tal 1238 (cuant che a deciderin di trasferîsi a Udin), e fasè duncje lis funzions di capitâl dal Stât patriarcjâl. La diocesi e metropolie patriarcjâl e deventà une des plui grandis di dute la Ete di mieç in Europe. La provincie eclesiastiche e rivà a nord fin su la Danau, te part ocidentâl fin plui sù di Como, e cjapà dentri part de Istrie e des tieris de Slovenie di vuê. Il Patriarcje al nomenave i vescui sot de sô jurisdizion e la sô cort e tignive dentri popui di lenghis e etniis diferentis: mont latin, gjermanic e slâf. Ai 3 di Avrîl dal 1077, pe fedeltât al Imperadôr gjermanic Indrì IV, Siart al ven fat Duche dal Friûl, Marchês di Istrie e i ven dât il titul di Princip: al nas il Principât eclesiastic di Aquilee, feut diret dal Sacri Imperi Roman. La “Messe dal Spadon”, che o lin indenant a tramandâ ogni an ai 6 di Zenâr, e testemonee la cerimonie di invistidure dal Patriarcje, feudatari dal Imperadôr. La rievocazion storiche che si fâs dopo messe invezit, e ricuarde la jentrade in citât tal 1366 dal Patriarcje Marquart von Randeck (che al promulgà lis Constitutiones Patriae Foriiulii, un corpus di leçs che al restà fin tal secul XVIII). Dulinvie dal periodi patriarcjâl a forin disvilupâts i trafics comerciâi e lis ativitât produtivis, e fo miorade la rêt viarie e inviulade la vite culturâl, in gracie soredut dai scambis cul teritori todesc e la cort imperiâl, di dulà che a vignivin i Patriarcjis di chel periodi. Di dut chest si avantazà ancje Cividât che al someave a “une citât grande”, come che nus conte Luigi da Porto, cjapitani a Cividât tai agns tor dal 1511, autôr de trame di amôr che po William Shakespeare al rindè famose tal mont (la nestre aministrazion e sta par memoreâ la storie cuntune lapide).
Mi plâs ancje ricuardâ che il Patriarcjât di Aquilee al rivà a vê une des formis plui evoludis di organizazion politiche te Europe medievâl, sù par jù tal timp de Anglie, cu la esperience de Assemblee dal Parlament de Patrie dal Friûl, nassude za tal secul XII e che si zontà al podê dal Patriarcje.
Cuant che Cividât al è al centri de storie de Patrie, la lenghe furlane si vuadagne un puest tra lis lenghis cognossudis ator pe Italie, tant che ancje Dante le nomene. A vegnin di Cividât lis testemoneancis plui antighis che nus restin de lenghe furlane: un document furlan dal 1284, un “Frament” di une cjarte di une famee di Cividât, i esercizis di version dal furlan al latin dal secul XIV, doprâts te Scuele par nodârs di chel timp. Al è di Cividât un cuader di ats processuâi par furlan, la poesie Biello dumnlo di valor e chê altre plui antighe che nus reste Piruç myo doç inculurit, e fo scrite cuasi dal sigûr par cividalês antîc dal nodâr Antoni Porenzon, duncje di une persone tra lis plui inscueladis di chê epoche.
Chel stes furlan che vuê aromai in pôcs a san scrivi e che anzit, come tai timps plui antîcs, cumò soredut lis personis plui atentis ae culture a doprin cun braùre. La Regjon invezit e fâs inmò fadie a garantî tes scuelis di ogni grât un fregul di continuitât (e sarès une ore dome a setemane ma ancje chest an mi disin che lis lezions a àn podût tacâ dome vie pal mês di Zenâr o Fevrâr), ancje se si continuin a fâ tancj proclamis.
No podìn dâsi di maravee se inmò pôcs lu san scrivi o lei…
O invidi però i zovins a deventâ simpri plui braurôs dal patrimoni unic che o vin te nestre regjon, diferent di ogni altre bande dal mont, parcè che no si pues rivâ trop lontan se no si àn lidrîs ben saldis. ❚
Stefano Balloch, sindic di Cividât
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +