Sfuei Mensîl Furlan Indipendent
Archivi de Patrie

Dario Zampa e i siei 40 agns cjantant il Friûl

............

Al è un dai cjantautôrs furlans plui cognossûts e par tancj al è “il” cjantautôr furlan par antonomasie. O fevelìn di Dario Zampa, che a Dicembar al à fat fieste pai cuarante agns di cariere artistiche. Lu vin incuintrât par fâi cualchi domande. Chi ce che nus a contât. Come simpri, a lenghe sclete. (E mancul mâl. Augurons Dario!).
–––
Zampa cemût che si staial cun 40 agns di cariere?
“Si sta ben, ancje cun cualchi an di plui su la gobe, par vie che se dopo 40 agns di ativitât artistiche no ti àn dismenteât al vûl dî che al è restât ancjemò un agâr là che e pues cori… aghe furlane”.
–––
Isal sodisfat di cemût che e je lade fin cumò?
“Sì, o soi sodisfat! Cence slungjâmi tai particolârs o pues dî che ta chest arc di timp, metint in cont il pro e il cuintri che al segnale cualsisei percors, a conts fats il risultât al è positîf”.
–––
A Dicembar stât lu àn festezât cuntune fieste “Il Friûl di Dario Zampa” a teatri a Udin. Cemût ise lade?
“E je lade plui che ben. Sintî lis mês cjançons interpretadis di cjantants, pe plui part zovins, che lis àn presentadis a lôr mût cun grinte e art, mi à emozionât. Mi son plasudis plui… dal origjinâl. Par chest mi sint di ringraziâ di cûr ducj chei che a àn colaborât a chest apontament: cjantants, presentadôrs e la Provincie di Udin”.
–––
Jessi un pont di riferiment pe furlanitât e je une biele responsabilitât…
“Mi somee un pôc esagjerât. E je une responsabilitât masse grande! A son ben altris i ponts di riferiment de furlanetât. Di pre Checo Placerean a pre Toni Beline, e altris ancjemò. O pues intrometimi dome se si cjacare di cjançon popolâr furlane. Li sì! O crôt di jessi jentrât tal cûr dai furlans plui di tancj altris”.
–––
Dario Zampa isal “moderni” ancje pes gjenerazions di vuê?
“No crôt di sedi moderni. O crôt però che e puedi tornâ di mode la tradizion. Mi spieghi: la confusion gjenerâl dal vivi di vuê, che si ridûs a chê brute peraule che je “omologazion”, a cîr di “robâ” valôrs e identitât e, duncje, al sarà normâl che, prin o dopo, un zovin si domandi se e vâl la pene di vivi dome cuntun “numar” su la schene, come chei che a son in preson. Ta chest câs o pues sedi ancjemò util pes gnovis gjenerazions” (Util e ancjemò “mitic”: i zovins a deventin mats a fâsi un “selfie” cun lui co che lu cjatin par strade, ndr).
–––
La musiche e pol ancjemò jessi un baluart par pandi ator le identitât furlane?
“Di sigûr! Tal gno câs, no jessint un musicist, o met in prin plan la lenghe furlane che mi pâr ancjemò plui impuartante de musiche cuant che si fevele di identitât. La musiche si preste di plui aes contaminazions, ae ricercje di cheste “modernitât” che, tal nestri câs, a pues facilmentri puartâti fûr di strade. La lenghe no si barate! Al è un pont di riferiment une vore plui clâr”.
–––
Cemût viodial la sene musicale di vuê in lenghe furlane?
“Ultimementri no mi displâs. E je tornade a saltâ fûr une ondade di artiscj che si fasin preseâ soredut tal forest. A àn puartât a cjase premis impuartants vincint concors nazionâi e cjantant in lenghe furlane. Cheste gnove situazion e je interessante. Ancje se in Friûl, purtrop, e rive dome la notizie di chestis prestazions forestis, si cree une imagjin di furlanetât impuartante, che e zove plui di ce che si pense ae nestre cause. Come a dî che i forescj a crodin plui di nô ae identitât di ognidun. Orpo che e zove! Chi o vin dificoltât a fâ un festival de cjançon furlane”.
–––
Saressie stade divierse cence di lui?
“No lu sai! Probabilmentri e sarès stade la stesse. Forsit tal timp, tai varis passaçs artistics dai nestris musiciscj e autôrs e à zovât ancje la mê vene… se no altri par cambiâ ‘musiche’! Al pues vê zovât ancje par chel”.
–––
Lui al à dit di sintisi l’unic cjantautôr furlan “politic”, ce volevial dî?
“No soi un politic, ma no contesti cheste definizion. Pal vêr, tai agns ’90, o ai cirût di intrufulâmi tal nestri labirint politic: o soi stât conseîr provinciâl cul Moviment Friûl… o ai tentât! O intindevi dî che cence la volontât dai politics al è une vore plui dificil sostignî culture e identitât furlane. In plui di cualchi cjante o cualchi gno intervent o ai fat presint cheste mancjance ‘politiche’ tal nestri setôr. No mi visi di altris artiscj furlans che a vedin metût la muse… in politiche”.
–––
Lui al à un biel osservatori. In 40 agns di cariere cemût ise cambiade la Patrie?
“E je cambiade cetant. Ma lu riten un fat normâl. Dal gno osservatori o pues dî che i furlans, int di indule austriacante, a son stâts talianizâts. O vin cjapât plui di chei dal Sud che di chei dal Nord. ‘Brâf chel che al è rivât a lâ in pension a 40 agns…’, ‘Bulo chel che al vîf aes spalis dal sisteme…’, ‘Svelt chel che al rive a freâti…’. Si fevele di valôrs. Sino capîts”!
–––
E lui, Zampa, cemût isal cambiât in chescj agns?
“Probabilmentri no soi cambiât. O soi restât simpri chel! Forsit chest mi à zovât a mantignî une ‘identitât’ visibile, clare, cence compromissions. O crôt che al sedi chest che al fâs dî che o soi un pont di riferiment”.
–––
Secont lui isal interès di bande dai zovins par mantignî la identitât?
“O crôt di sì. O tornìn, però, al discors di prime. I vûl che i crodi ancje la politiche. E je chê, soredut, che à di vê l’interès par trasmetile ai zovins, ai gnûfs rivâts. Al contrari, dut al ven lassât ae buine volontât di cualchidun che, di bessôl, nol rivarà mai a tignî bot a cheste omologazion che e distirpe i valôrs”.
–––
Ce doman si augurial pe nestre tiere?
“Mi auguri che e resti furlane. No son i cambiaments che a fasin pierdi une identitât ma la voie o no di mantignîle. Jo o cognòs neris, marochins, albanês, napoletans, che a cjacarin furlan e che a cirin di convivi cu la nestre identitât. Chei a son i furlans di doman che a son come i furlans di une volte. Se nô i tignìn ae nestre tiere chei chi nus vegnin daûr. Ma i tegnìno?”
–––
Ce nus mancjal, secont lui, plui di dut?
“I rapresentants che o vin vuê in regjon a son neâts tal sostignî il Friûl. Se tu ur domandis alc ti disin che ‘a son ben altris i problemis’. No pues jessi rispueste plui ignorante! Nus mancje di sigûr un moviment politic che al sostegni la nestre cause. Lu vevin, ma lu vin lassât murî cul deventâ ‘masse talians'”.
–––
Aial cualchi sium artistic ancjemò di realizâ?
“Sì! Deventâ vecjo e viodi i fruts e i zovins che a vegnin a intervistâmi su cemût che le pensi sul… popul furlan. Une testemoneance che e sarès un spetacul ancje chê”.
–––
Lui al à dit che cu la etât si olse di plui. Ce vino di spietâsi di Dario Zampa pal avignî?
“Un pinsîr libar, come chel che o ai vût te cheste interviste. Mandi”! ❚
✒ Natascia Gargano

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +