Sfuei Mensîl Furlan Indipendent
Archivi de Patrie

50 AGNS DE REGJON. Lis prospetivis

............

.

Lis lengatis de politiche nazionâl a diserin che il Friûl-Vignesie Julie al fo la ultime des regjons a statût speciâl e la prime des ordenariis: se o cjalìn lis datis, in efiets, dutis chês altris cuatri regjons (Trentin-Sud Tirôl, Val di Aoste, Sicilie e Sardegne) a forin inmaneadis in pratiche la dì dopo la aprovazion de Cjarte, une daûr chê altre, tal Fevrâr dal 1948. Lis regjons “ordenariis” (Molise a part, 1963), dutis tal 1970. Se po o cjalìn la dotazion finanziarie, il trasferiment di bêçs di Rome, il Friûl-Vignesie Julie nol è mai stât teren di concessions sioris, ni di flums di bêçs. Anzit, rispiet a ciertis regjons “spint e spant” e je stade puartade dispès a esempli pe virtuositât dai siei conts. Cheste considerazion par vierzi il cjapitul des prospetivis, dal avignî di chest teritori intune suaze dal dut gnove rispiet ai agns dal post 1947 e dal 1963, soredut sot il profîl gjeopolitic e economic, che o podin dî che a van a dissegnâ un gnûf mût di pensâ la specialitât.
Cincuante agns dopo, o cjatìn un teritori che la tiere di confin si è intarsiade tal senari european. Lis leçs – dal 1978 cu la istituzion di Alpe Adria, fintremai ae creazion, tal Novembar dal 2012, dai Gect “Cence confins” (il grup european di cooperazion teritoriâl, che al metè adun i presidents di Venit, Friûl-Vignesie Julie, dal Land de Carinzie, de Slovenie e, ultin ingrès, des conteis istrianis de Cravuazie) – a àn viert cul timp un spazi european pe cooperazion transfrontaliere, transnazionâl e interregjonâl, propit cu la finalitât di rinfuarcî la coesion economiche e sociâl dai teritoris. Vincint la pôre dai paris de regjon: l’isolament. Ciert, i spazis concrets, la operativitât te cuotidianitât, cemût che chest Gect al influençarà la vite di ogni dì di dute la comunitât regjonâl si à ancjemò di viodi ae prove dai fats, no cate la boutade sul pont nassite transfrontalîrs dal Gurizan. Al moment, o sin denant di intindiments e di protocoi di intese, come chei dai ultins dîs dal 2014: un acuardi in materie di protezion civîl e sanitât, che al à ancje individuât altris cantins strategjics su turisim, traspuarts e culture, di lavorâur parsore midiant di fonts struturâi e di invistiments europeans 2014-2020.
Al è cambiât il cuadri economic, in cincuante agns. La crisi dal debit public e à taiât i trasferiments viers i ents intermediis: il rispiet dai parametris fiscâi domandâts de Union Europeane nus àn imponût sacrificis, dopo agns di vacjis grassis, di spesis cence limit (peadis a riformis in deficit spending) e ancje di massepassudancis. Si à di taiâ, si à di razionalizâ, nus disin di un continui. Il probleme al è ce rûl dâ a chescj ents come lis regjons, ce funzions dâur daspò la pussibile sieradure des Provinciis par che no si ingolfin di competencis e di lavoradôrs che no saressin in stât di gjestî. E, o zontìn, ancje cemût diferenziâ chês regjons che e funzion ben di chês che tai agns a àn regjistrade une esplosion des spesis. Si che duncje, il dibatit al passe a chescj dîs, al futûr de specialitât e des autonomiis locâls: li che la storie e à dimostrât in 50 agns che alc al è stât fat, che alc al à funzionât, al sarès fûr lûc dineâ, dismenteâ lis bataiis e lis lotis, e messedâ inte stesse cjalderie chel che cun fadie si à otignût cun ce che altris regjons no son stadis in stât di gjestî. ❚
O.P.

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +