Incuintris istituzionâi

Une delegazion dal Comitât pe autonomie e il rilanç dal Friûl, vuidade dal President prof. Gianfranco D’Aronco, e à vût ae fin di Jugn incuintris par discuti des cuistions de nestre tiere cu lis plui altis carichis istituzionâls de Regjon, de Province di Udin, dal Comun di Udin e de Universitât dal Friûl, daspò la lôr nomine. Prime di chestis autoritâts civîls, il Comitât al veve incuintrât il Vicjari dal Arcivescul di Udin, bonsignor Gherbezza che, come simpri, al à dât autorevui conseis e la poie de Glesie dal Friûl ae bataie pai dirits dal popul furlan.
Si pues dî che chescj incuintris a son stâts dal sigûr impuartants parcè che, prime di dut, a àn zovât a sensibilizâ su la cuistion furlane ancje i gnûfs sorestants e po parcè che, su cualchi cantin, o vin cjatât disponibilitât e su cualchi altri voie di discuti e di lâ in font. Impuartant, a proposit de leç pal furlan, l’acuardi dal President Tondo e dal assessôr Molinaro a no cjapâ iniziativis di gambiâle, prin de sentence de Cort Costituzionâl. Adun cul mandât ai avocatz de Regjon di difindi la leç come votade dal Consei regjonâl, ancje par parâ, cun jê, la nestre autonomie speciâl. A chest proposit, il Comitât al à conseât il President Tondo di no molâ la bataie par difindi, anzit par insiorâ, la specialitât de nestre Regjon in reson de fuarte presince chenti di minorancis linguistichis e par otignî, par jê, un Statût speciâl cun plui competencis e mieçs finanziaris, sicu il Trentin-Sudtirôl e la Val di Aoste. Impuartant l’impegn di Tondo a intervignî, subìt e cun decision, sul Guvier di Rome e su la Rai pe firme di une convenzion che e garantissi il passaç de fase sperimentâl di vuê a programs permanents radio – televisîfs di gnovis e di culture in lenghe furlane.
Il President Fontanini, in là dal impegn pe difese de leç regjonâl su la lenghe furlane, si è impegnât a puartâ indenant cun Pordenon e Gurize, la Comunitât des Provinciis furlanis che e à di presentâ unît il Friûl, sparniçât di vuê e che e à di vignî doprade par meti in jessi progjets pal disvilup economic, sociâl e culturâl dal intîr Friûl. Il gnûf Sindic di Udin, Honsell e la sô Zonte, si son impegnâts a puestis di grant nivel par puartâ adalt e concretizâ il rûl di Udin, capitâl storiche de nestre tiere, insiemit ai Comuns, aes Provinciis, ae Universitât dal Friûl, aes Associazions culturâls, economichis e sociâls. La gnove Retore dal Ateneu, Compagno, e à dit di volê lâ indenant cuntune presince de Universitât furlane, sicu ciâf-pensîr dal nestri popul e de nestre zoventût. Purpûr e à domandât il sopuart dal Comitât e dal Friûl te bataie cul Guvier di Rome che al taie i finanziaments pal so disvilup e par ridusi la sô autonomie.
In conclusion, curtis e che si tocjin, i rapuarts a son bogns e plens di rispiet. Ma al Friûl e a noaltris no bastin. Al ocor che des peraulis e des buinis intenzions si passi ai fats. Al è chel che i furlans a spietin e par chest a lotaran ancjemò e simpri.