Sfuei Mensîl Furlan Indipendent
Archivi de Patrie

Pordenon a à dit NO al bilinguisim!

Sandri Olivetto

Ai 7 di Lui passât, jenfri la zonte comunâl di Pordenon dilunc une sentade dal consei, si è rivâts cuasi a une crisi cun tant di crevadure jenfri i partîts de maiorance. Cause dal cuntindi, la delibare presentade dal assessôr comunâl ai afârs gjenerâi, li che si domande la esclusion dal teritori comunâl di Pordenon de liste dai ents locâi dulà che si fevele tradizionalmentri e significativementri il furlan.
MOTIVAZIONS IGNORADIS_ Par sostignî il bilinguisim a son stadis puartadis une vore di motivazions, da lis origjins storichis, a lis oportunitâts politichis, da la sensibilitât dal cjâflûc viers i teritoris de provincie (par la grande part di lenghe furlane…), ai finanziaments, ma cun dut chel, il furlan al è stât gjavât di mieç. A dispiet di une volontât di Cardin (Vîf Pordenon) di sopindi il proviodiment in spiete di lâ in font inte cuistion, la sentade e je lade indevant e a pro de esclusion si son declarâts favorevui 32 conseîrs (FI, AN e PD) e contraris 4 (Cantiello dal grup mist, Cardin dal PD, Piccin e Caufin de LN).
Come chi dispès al sucêt, par justificâ une sielte che si sa bielzà jessi impopolâr, a vegnin tiradis in cjamp motivazions di caratar economic aministratîf (miôr spindi i bêçs par comedâ stradis e vie discurint…) e tal stes timp no si ten cont dai risvolts che la decision stesse e pues vê.
CUSSÍ LA LEÇ_ La lêç regjonâl e proviôt che i ents locâi a podin sielzi in libertât lis modalitâts di adesion al protocol (in base a lis sô esigjencis) e che i finanziaments di conseguençe a son adeguâts a lis necessitâts; viodûts i numars di spese presentâts come motivazion par gjavâsi fûr de lêç, al ven di pensâ che il test de leç stesse nol è stât let ad implen, ancje par vie che come che ben si sa, jessint finanziaments bielzà stanziâts (e in carghe a Regjon e Provincie), no vêju nol significhe fâ sparagnâ bêçs a la comunitât ma dome pierdiju. Di no sotvalutâ nancje il fat che di une leç come che pal furlan al è facil gjavâsi fûr, ma tal câs di un futûr e pôc probabil ripensament al sarà avonde dificil, se no che impussibil, tornâ dentri (par chel che al rivuarde il doprâ i finanziaments a nivel scolastic, par progjets di insegnament leâts al furlan, par furtune i articui 3 e 18 a garantissin il sostegn ancje a lis areis esclududis).
DECISION PENALIZANT_ Une decision come chê cjapade da la zonte di Pordenon e pues jessi penalizant par dute la regjon, parcè che e podarès fâ nassi dubits su la reâl validitât e aplicabilitât dal test in cuistion. Al ven di pensâ ancje che la premure doprade e vedi un so altri parcè, viodût che suntun teme cussì delicât, no je stade ni sintude ni cjapade in considerazion la volontât de int, e par di plui, passant intune setemane da la Comission al Consei, al è mancjât il timp di preparâ une reazion (…cualchidun, un dì, al à dite che a pensâ mâl si fâ pecjât ma… dispès si le induvine!).
Dal sigûr a Pordenon no si fevele furlan come intai paîs dulintor, ma in passât si fevelave un furlan no tant difarent dal “Folp” di Cordenons (paîs cunfinant) o di chel di altris zonis subit dongje. Fat chest che nol fâs dal cjâflûc dal Friûl Ocidentâl un riferiment pal furlan, ma che le dîs lungje su la legjerece doprade di cualchi aministradôr, cuant che al berle di partignince storiche.
Il numar di personis di Pordenon che a fevelin par furlan al è bas, ma il numar di chei che in citât a lavorin ducj i dîs, e che a fevelin in marilenghe al è impuartant; par di plui il furlan in citât lu capissin ben e a son ancje tantis ativitâts comerciâls che a fasin da la partignince al Friûl il siei mutîf di svant.
INTEGRAZION MANCJADE_ Intune comunitât dulà che, par vie de di imigrazion e de necessitât di man di opare, si fevele tant di integrazion e cunvivence cun altris culturis, al preocupe il fat che e ven discungnussude e discriminade propite la culture des lidrîs storichis. La stesse culture che invezit a rivendichin cun fuarce i paîs subit dongje di Pordenon che dal Venit a vuelin mudâ regjon e tornâ in Patrie (Cint, Midune di Livence, Pramaiôr e Tei…) fuarts di un passât di culture e lenghe furlane. La stesse culture che propite intai ultins agns a tornin a scuvierzi une vore di paîs dal “hinterland” e de zone di Cjanive, Budoie e Dardâs li che une vore di publicazions e manifestazions a àn come smire il tornâ a scuvierzi lis lidrîs storichis e la partignince a une Patrie. La stesse culture che (cun buine pâs dai aministradôrs di Pordenon), e caraterize la grande part dal teritori di une provincie che e fasarà une vore plui fadie a ricognossisi cul so cjâflûc.

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +