Sfuei Mensîl Furlan Indipendent
Archivi de Patrie

CURTIS E CHE SI TOCJIN. Ancjemò in lote pal furlan in television

............

E je la tierce volte in sîs agns che une delegazion rapresentative de furlanetât e des Istituzions dal Friûl e va jù a Rome in Parlament par otignî che la Rai e il Guvier a rispietin lis normativis talianis e europeanis in pro de lenghe furlane cun notiziaris e programs culturâi in marilenghe. Te delegazion a jerin presints l’assessôr regjonâl Molinaro, il President de Provincie di Udin Fontanini, il Sindic de capitâl storiche furlane Honsell, il sotscrit par cont sedi dal Comitât pe autonomie e il rilanç dal Friûl sedi dal Comitât pe metude in vore de leç statâl 482. Chês altris dôs dadis a jerin ancje presints bonsignôr Corgnali pes Diocesis dal Friûl, i Presidents des Provinciis di Gurize e Pordenon Brandolin e De Anna, i Retôrs de Universitât dal Friûl dal timp Strassoldo e Honsell, la rapresentance dai gjornaliscj de Rai di Udin.
Sedi tal passât mês di Avrîl che chês altris dôs voltis, il nestri obietîf al è stât chel di pratindi che il Parlament talian, tal sô parê sul gnûf contrat di servizi tra la Rai e il Guvier – che al ven fat gnûf ogni trê agns – al disi clâr e net che si à di rispietâ ad in plen lis disposizions de leç 482 dal 1999 e lis diretivis europeanis pal furlan. Cemût che al sucêt za sedi pe lenghe slovene che par chê todescje e ladine dal Trentin – Sudtirol, che par chê francese de Val d’Aoste.
Il biel e tragjic tal stes timp, al è che ancje cheste dade i rapresentants dal Parlament talian, cussì come tai agns passâts, nus àn dât reson in plen. Lu àn scrit neri su blanc tal lôr parê al Guvier e ae Rai, ma fin cumò sei il Guvier che la Rai chel parê favorevul dal Parlament lu àn metût sot i pîts.
Ai parlamentârs di centri drete e di centri çampe de Comission di vigjilance dai servizis radiotelevisîfs, no ur vin dite dome di tignî cont dai dirits dai furlans, ma ju vin ancje sburtâts a alçâ la vôs e a pratindi che Guvier e Rai – che a son tignûts par Costituzion de Republiche a rispietâ la volontât dal Parlament – cheste volte lu rispietin sul seri. Al è di fat ore di finîle di mandâ in onde par furlan dome cinc dîs ae setemane cualchi desene di minûts di coments in lenghe furlane. Chest program, cussì stransît za in partence, al jere considerât un progjet pilote di pocje durade. Subit daûr e veve di vignî une vere e proprie convenzion dal Guvier cu la Rai che e regolàs in maniere adeguade la materie. Invezit al è plui di un an che o sin simpri fers… al imprin. E cui bêçs de Regjon!
Come che al sucêt pes altris lenghis di minorance, ancje il furlan al à di jessi tratât tal rispiet de sô dignitât di lenghe di un popul. O pratindìn une Redazion gjornalistiche furlane autonome metude a pueste a Udin, capitâl storiche dal Friûl intîr, cun programs di gnovis e di culture sedi pe radio che pe television, di meti in onde ogni dì e par cualchi ore in dì. Se cheste volte – che e je la tierce – Guvier, Partîts e Regjon no fasaran rispietâ ae Rai i nestris dirits, i furlans a savaran, come sot la lûs dal soreli, di cui che e je la colpe.
ARNALT BARACÊT

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +