Il furlan un pôc lu capìs, ancje se i dûl di no vêlu sintût fevelâ di zovin, e al presee un grum il sens di identitât che a àn ancjemò i furlans. Un valôr impuartanton massime in cheste ete globâl. Lu dîs a clâr Krzysztof Zanussi, inteletuâl european nassût a Versavie tal 1939, regjist, produtôr, senegjatôr, autôr di cines di grant impegn morâl e di elegance formâl, cognossûts in dut il mont e che i àn valût cetancj premis e ricognossiments internazionâi (tant che «Di un paîs lontan», pelicule su la vite di Karol Wojtyla, e «L’an dal soreli cuiet», che e à vinçût il Leon di aur ae Mostre dal cine di Vignesie).
A Udin, ai 17 di Mai, par presentâ il so libri «Timp di murî. Ricuarts, riflessions, storiis» – un diari che al è lezion di vite, di cine, conte di fede, oltri che fotografie di une ete interie e dai siei cambiaments -, dât fûr de cjase editore Spirali, Zanussi al ricuarde «cun tenarece» lis sôs origjinis furlanis. «Tal Votcent – al dîs, vint iniment chel che i contavin il pari e il nono -, tal timp de costruzion des feroviis, un gno von, des bandis di Pordenon, forsi di Cjistiel, cence jessi dai confins dal ream dai Asburgs, al fasè sù la ferovie di Vignesie a Viene e po fin a Leopoli. Tant che i miei vons, ancje jo, tal cjamp de culture, o cîr di fâ colegaments, di meti jù puints».
Zanussi al confide che la memorie dai vons «e je simpri vive». Ancje in gracie dai incuintris che al fâs. «Viazant par presentâ i miei cines, in cetancj Paîs, massime Canadà, Australie e Argjentine, o soi stât ricevût cun calôr no dome dai emigrâts polacs, ma ancje di chei furlans. O sint di apartignî a ducj i doi i popui». In «Timp di murî», Zanussi al scrîf di invidiâ cui che al cognòs ben la sô gjenealogjie. «Si sintìn plui sigûrs se o savìn cui che o sin – al sclarìs a vôs -, se o cognòs la mê identitât no ai pôre di chei altris, anzit, mi vierç a chei altris. Jo no ai pôre di cui che al à une identitât fuarte, o ai un pocje di pôre des personis confusionadis, pierdudis, dai cosmopolitis superficiâi».
Une idee de tiere di origjine il cineast polac le à (di un pôc di timp incà al ten i contats cu la famee Zanussi, chê che e à fondât la innomenade aziende di eletrodomestics, lontane parintât dal regjist polac), massime dai furlans: »Lavoradôrs, organizâts e inventîfs», al dîs.
Prime di saludâsi, Zanussi mi fevele di un fat che pôcs a cognossin. Dilunc des ripresis in Polonie dal cine su pape Zuan Pauli II, fat in cooperazion cu la Italie, lis comparsis, pe plui part contadins di mont, a ufririn la paie di une zornade di lavôr pai taramotâts dal Friûl. «Al fo un grum comovent – al ricuarde Zanussi -. Lis comparsis, 3 mil sù par jù, a rivavin di cetantis parochiis de mont. A jerin zornadis fredis e cu la nêf. Nus diserin che no volevin vendi la lôr soference. Lôr a jerin li pal Pape e, te Polonie comuniste, cheste e jere une sielte di oposizion. I bêçs a forin dâts ae Crôs rosse taliane, par cuistâ tendis e altris materiâi pai taramotâts furlans. No si saveve masse di chê tragjedie, ma l’impuartant al jere dâ alc a cui che al veve dibisugne».
ERIKA ADAMI
Stin dongje ae Patrie
Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +