Sfuei Mensîl Furlan Indipendent
Archivi de Patrie

Cumò ancje i furlans a puedin sperâ di deventâ un stât

Mastiefumate
Tessitori tal so studio

Brut fat chel capitât te aule dal Consei regjonâl a Triest intant de discussion di une mozion tal mês passât. Almancul a crodi a ce che a scrivin i gjornâi. No tant pal fat in se ma pal mût di fâ. Puedial un assessôr de Zonte regjonâl menaçâ a vôs alte un conseîr che lu stuzighe? Isal coret che un dirigjent di une imprese al difidi, cun tant di cjarte scrite dal avocat, un conseîr che al domande sclariments sui rapuarts economics tra la stesse imprese e la Regjon che il dirigjent al rapresente in mût diret, jessint ancje assessôr regjonâl? Cheste confusion di rûl nus pâr une vore simboliche dal fat che ancje inte regjon Friûl – V.J. si stan doprant i mûts di fâ politiche di altris latitudins. Isal un segn dai timps che o stin vivint? Ise cheste la democrazie e la autonomie volude di Tessitori?
◆ E Fedriga, tant atent ai dirits di ducj, no dome al permet ategjaments di cheste fate ma ancje ju justifiche? O vin di stâ atents parcè che, se la politiche no rive di bessole a autoregolamentâsi, a produsi i anticuarps e a mantignî i fondaments de democrazie nancje tal “parlament” regjonâl, alore o podìn scomençâ a preocupâsi… o a consolâsi.
◆ Cuant che a Ben Gurion, vecjo president dal zovin stât di Israêl, in ocasion de jentrade in chês tieris di un bon numar di ebreus che a vignivin de Europe dal Est, i àn dit: “President, cun chê gjernazie che e je jentrade a son rivadis ancje mafie e putanis”. “Bon segn – al à rispuindût il cjai – Israêl cumò al è finalmentri un vêr stât”.
◆ Che e sedi sperance che ancje il Friûl al deventi stât? ❚

Stin dongje ae Patrie

Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +