CULTURE – TAL ETERE. Furlan in tv. Dulà?

Il periodi al è pardabon sterp. “Di magri”, si podarès olsâ di dî. Une Cuaresime catodiche. Di fat, cul tai ai fonts pai progjets dai programs televisîfs in marilenghe, al somee che si sedi secjade la lidrîs. Cui aie viodût di resint cualchi trasmission in television par furlan? A mancul che no fasìn man basse tai archivis di agns indaûr, robe par altri un grum di mode soredut tai periodis di vacance, la creativitât produtive e je lade a fâsi benedî – se e je mai esistude. Saraial forsit che cheste ultime facoltât si impie dome cuant che la part statâl e ripristine i finanziaments o cuant che a jessin i gnûfs bants dal assessorât regjonâl ae culture? Pussibil che l’autofinanziament o l’autoproduzion e sedi ancjemò cussì miope in cjase nestre, confinantle dome a ciertis altris realtâts linguistichis maioritariis (talian)?
Ve a stâi che di front ae puaretât des propuestis, chei plui galiots cul strument Internet e cul computer a puedin passâ il lôr timp a sgarfâ e a cirî. Si cjate di dut. Dai stupidets aes robis plui inovativis. Par esempli, nus è rivât devant il canâl Youtube: http://www.youtube.com/user/luxaud. Sottitul descritîf: “Video TV par furlan in spiete di une TV che no rivarà MAI!-)))”. 33 videos cjariâts, di varie durade: des vielis produzions di “+sklet” a “Balon salvadi”, fintremai ai filmâts tematics dedicâts a manifestazions, incuintris musicâi, scandais culturâi. Insome, un canâl alternatîf, indreçât e incressût tal ultin mês. Scuasi une rispueste al “vacuum” che si cjate di chê altre bande, sul media tradizionâl. No si discut il “zûc” dai condutôrs tal mieç dai events: cun chê sensazion di jessi capitât culì par câs, cun chês musis di maravee e di straneneament, al rapresente l’insiorament dal program stes, par vie che al romp i schemis tradizionâls dai condutôrs za preparâts e che dut a san e dut a vuelin insegnâ. E je la scuvierte di un Friûl contât cun voi diviers. In cheste direzion, la rêt e ufrìs di dut.
Al reste pluitost il dubi des fassis di etât sul acès. Che a son limitadis a cui che al à pratiche cul mieç: mê none, che magari e vorès viodisi la storie dal emigrant di Resiute, no savarès di ce bande cjapâ in man une tastiere di pc. Al è l’eterni paradòs dai canâi di youtube: la libertât slargjade dal materiâl a disposizion versus la ristretece, ancjemò, dai utents. Magari cussì no, ma almancul al judarà il procès di svicinament ae lenghe de bande dai zovins, plui evident di ce che in tancj no crodin che al sedi.
REDAZION