CULTURE – “Us conti une conte…”

IL TEATRI DI “STORYTELLING”_” None, mi contistu une storie?”: forsit cheste no je une domande che si sint cussì spes in dì di vuê, ma un timp cuissà cetantis voltis che i nevôts, massime prime di lâ a durmî, i domandavin ae none di saurî i lôr siums cuntune biele conte. E se cumò chel compit di lassâ cori la fantasie al vignìs davuelt dai atôrs su la sene, ce sucedaressial? Al vignarès fûr un teatri di “storytelling”, come che a disin par inglês, ven a stâi un teatri – che in realtât al à lidrîs antighis, stant che al nas ancjemò prime de scriture, te ete des popolazions nomadis – là che a sparonâ a son la pure improvisazion, la inventive, la gjestualitât, insumis un teatri che al da puest ae braure di creâ storiis doprant la fantasie, il cuarp, la vôs.
SONIA COSSETTINI_ Propit cheste fate di teatri e à striât une furlane, Sonia Cossettini, che di agns e lavore a Rome cu la compagnie “Raccontamiunastoria”, prime compagnie di “storytelling” in Italie, nassude tal 2004: cun chê, e à vût mût di studiâ miôr il gjenar e di metisi ae prove te narazion orâl, lant parfin in Canadà al Festival Internazionâl di Storytelling di Toronto cul spetacul “Maria. Storia di tre donne”, tal 2009. Tal stes an, Sonia e partecipe ae promozion dal prin Festival di Storytelling a Rome, fondât sul sproc “Nuie al pues gambiâ la vite plui di une buine storie…”. E propite inte suaze di chest Festival, che cumò al è rivât ae tierce edizion, si inserìs il gnûf spetacul che Sonia e à burît fûr, presentât dai 29 di Setembar ai 2 di Otubar tal Zardin Regjonâl di Appia Antighe a Rome. Si trate di un conciert di storiis regjonâls dal titul “Us conti une conte…”, là che la biele Sonia – tra l’altri, vigjilesse tal criticât spot RAI sui dialets, metût adun par festezâ i 150 de Unitât di Italie e di fat doprât par sponsorizâ il paiament dal abonament televisîf…se visaiso? – si misure tra cjants, storiis e musiche, mostrant al public il patrimoni di contis dal nestri Friûl.
IL SPETACUL_La ricjece de narazion si maride cuntune altre tradizion “storiche” de nestre tiere: il scus. Di fat, une volte, dopo la racuelte de blave, lis feminis si cjatavin tes seris di Invier tes stalis o devant dal fogolâr par dividi lis panolis dal scus (doprât par fâ borsis, rosis, pipinis), e in chei moments di condivision lis storiis a cjatavin puest a plen titul, intant che i oms a specolavin i fasûi, tra un bon taiut e une cjantose. Sonia, duncje, che e met in sene sô mari a lavorâ il scus, e riclame in vite un cjanton di vite furlane di un timp, par dâ sbroc ae sô voie di storiis (e braure tal contâlis) e par condividi chel savôr di tradizion che nol va dismenteât.
Miscliçant furlan e talian, cu la sô espression de muse e gjestualitât dal cuarp, nus ripuarte a chel mont di storiis, di fantasie e di magjie che nus fâs dî: “Sonia, continus une conte…”.