CULTURE. Storie o storiis?

“La nestre regjon e je intune posizion favorevule par frontâ cheste gnove sfide, che dal sigûr e sarà buine di vinci, tornant a jessi ae avanguardie in Europe”.
Chest al è l’auspici finâl di chest libri (p. 132), scrit di Cecilia Brumat (Presidente de Associazion ALEF Buenos Aires e coordenadore dai circui furlans in Argjentine) e editât par cure dal Alef (associazion dai lavoradôrs emigrâts dal F.-V. G.) Une cicuantine di pagjinis par spagnûl, une cincuantine par furlan e, intal mieç, vincjecuatri fotografiis di localitâts variis de regjon e vot cjartutis geografichis storichis.
Un auspici che no si pues no condividi, ma che i volarès capî mior ce che al vûl dî. In particolâr si volarès capî ce che si intint par “nestre regjon”. La sielte di doprâ il furlan dongje dal spagnûl e fâs pensâ che il libri si indreci ai furlans, che al feveli dal Friûl. Ma nol è cussì.
Nancje il titul nol jude. Inte version spagnule si fevele propit di regjon. In chest câs, come che si sa, lis sôs origjinis no son cussì lontanis: cheste regjon e esist, di un pont di viste istituzionâl, dome dal 1963. Inte version furlane no si fevele di regjon, ma dome di Friûl – Vignesie Julie (il trait d’union al è restât, par fortune!). Ma nancje in chest câs no lin cussì lontan, par vie che di Vignesie Julie, storichementri, si à tacât a fevelâ dome pôc daspò de metât dal Votcent (Ascoli).
E cussì dute la vore e je condizionade di cheste ambiguitât: salacor al sarès stât ben declarâ in viertidure ce che la autore e intindeve par regjon, cuâi cunfins che i dave. Cun di fat, definî i cunfins de “nestre regjon” nol è facil: no son problemis de bande nord (montagnis e mont gjermanic) e sud (il mâr). Ma de bande ovest: Tiliment o Livence? Friûl storic o “napoleonic”? E, piês ancjemò, de bande est, dulà che o savìn ce tant ingredeade che e je stade la storie. La Brumat e cjape drenti inte sô analisi ancje dute la Istrie e fin a Flum. E je une sielte tant che une altre, ma, alore, cheste regjon ise Italie, ise dividude jenfri trê Stâts (Italie, Slovenie e Cravuazie), ise dôs regjons o ce?
O pensi che a divegnin di cheste ambiguitât di fonde ancje altris aspiets debui dal libri. Cuant che si fâs un struc di storie, si sa, la robe plui dificile e je sielzi no tant lis robis di dî, ma chês di no dî. Par vie che, si capìs, no si pues dî dut! Ma une date come chê dal 1077 mi pararès che, cuant che si fevele di Friûl, no varès vût di mancjâ! Come che no varès vût di mancjâ cualchi non de culture furlane, dongje di chei de culture istriane (Vergerio, Carpaccio, Tartini…p. 118).
Par cuintri nol mi pararès cussì essenzial memoreâ il “pentapartît”, Fanfani, Andreotti e Spadolini (p. 131).
Il tai de vore al è di stamp nazionalistic talian. Une sielte, ancje cheste, come une altre. Nol sarès stât mâl, però, almancul acenâ ancje a posizions difarentis de storiografie furlane. Se no altri che al è cualchidun che al considere la Vignesie Julie une regjon “inventade” e cualchidun altri che nol pense che i venezians de Serenissime a sedin stâts propit simpri espuartadors di civiltât: la vicende dai Uscocchi, par esempli, si pues contâle dal pont di viste venezian, ma ancje di chel de citadute di Senji, su la cueste dalmate (i Uscocchi a jerin logâts propi li), dulà che al è un piçul museu, propit inte fuartece fate sù dai venezians, li che la storie le contin difarente e e cjape dute une altre lûs.
Al libri a son alegâts trê sfueuts cul ‘errata corrige’ (fe de errats). Po ben e mancje une correzion: Aldo Moro al è stât rapît e copât intal 1978, no intal 1979 (p. 131).
Zuan Laurin Nardin