CULTURE – Serade in musiche par difindi il Tiliment

«O ai voie di jessi tal Tiliment», al scriveve Pier Paolo Pasolini intun scambi epistolâr cul so amì, ricuardant cun nostalgjie i agns passâts in cheste tiere une vore amade. E cemût no dâi reson, ducj i furlans a tegnin tal cûr un tocut dal lôr flum. Di chestis bandis, però, di agns si fevele di un progjet di autostrade, la Cimpello-Sequals-Glemone, che e passarès propri sul Tiliment e che nol plâs a ducj. Une part di popolazion locâl di fat si è dât dongje tal comitât Arca (Assieme Resistiamo Contro l’Autostrada), par dî NO ae autostrade sul Tiliment. La strade e varà un impat ambientâl disastrôs su di un ecosisteme preziosissim e intat come chel dal Tiliment – tant di meretâ l’apelatîf “re dai flums alpins” – e al contrari cuasi nissun impat economic e di servizi a favôr de comunitât locâl, a son in sintesi lis motivazions dal NO.
E ai 4 di Setembar intune sierade di fin Istât tor 500 personis (dâts dal comitât) si son cjatadis a Pinçan propit tal glereâl ae confluence tra l’Arzin e il Tiliment, par difindi il teritori ancje a timp di musiche. Cun lôr i miôr artiscj de musiche furlane, che a àn partecipât sore nuie: Carantan, Straulino Fedele & Vescovo, Bande Tzingare, Tarnoom, Renzo Stefanutti Ensemble cul poete Maurizio Mattiuzza, Dj Tubet, Orchestra Cortile, Fabian Riz, Nosisà, Mad Men Blues, Canzonîr di Dael.
Il conciert nol è stât a pro di un partît o di chel altri ma, come che a fasin savê i organizadôrs e come che al è scrit a clâr tal non dal event, al è stât un “Conciert pal Tiliment”. «O vin volût cjatâ cheste ocasion par puartâ la int a viodi ce che al è chest puest e par che si rindi cont che cheste no je une bataie ideologjiche: al è un motîf reâl e grâf par dî NO», al à dit a Radio Onde Furlane – partner de manifestazion – Alberto Durì, president dal comitât Arca. La ploie e a tacât a vignî jù un minût prime dal conciert (ce novitât) ma dal inizi ae fin de kermesse nissun al è lât vie dal so flum.
Par firmâ la petizion: www.comitato-arca.it
Par vê altris informazions: www.ondefurlane.eu, www.ilmiofiume.com
Natascia Gargano