CULTURE – “Patrie Tv” in gracie dal web

Lunis ai 26 di Setembar, zornade europeane del lenghis, o ai cjalât in streaming web l’incuintri  “Fevelâ furlan al è fevelâ european” insiemit ai amîs che cu la mê stesse semplicitât lu viodevin online de Danimarche.
Intant che di Cjampfuarmit, li de Ostarie “A le Patrie dal Friûl” (www.alepatriedalfriul.com), Marco Stolfo, autôr dal libri “Il Tratât di Lisbone. Argoments e documents pe integrazion europeane”, Silvio Moro e Renato Damiani, president e vicepresident de Cjase pe Europe (www.casaxeuropa.org) sot de conduzion e regjie di Christian Romanini, a discutevin di citadinance europeane e rispiete de identitât furlane intun contest internazionâl, in timp reâl, l’event al vignive filmât e trasmetût di une vore di servers ator pal mont. Cun di plui al jere pussibil partecipâ in maniere interative a la serade midiant de chat.
Il dut al è stât realizât midiant de colaborazion cun Marco Macorigh e la TradinvestTV (www.tradinvest.tv) che a àn metût a disposizion la plateforme pe direte su la lôr webTV (cjale ancje La Patrie dal Friûl n.10 dal 2010).
IL MONT “INTUNE STANZIE”_ Si è tratât di un prin esperiment che però al à puartât a passe une cincuantine di contats cun colegaments di Spilimberc, Maian, Udin, Milan, Turin, Londre, Cophenaghen, Buenos Aires, cence contâ chei che su la chat de direte no àn specificât di dulà che a cjalavin. Considerant che la pussibilitât di colegâsi in direte web e je stade publicizade dome pocjis oris prime de trasmission, il belanç di cheste prime esperience al pues jessi valutât in maniere positive. Lis pussibilitâts di chest sisteme mi àn impressionât e adun cu lis tematichis presentadis, come la nestre identitât furlane tal mont, mi àn fat pensâ su la comistion tra tradizion, storie e tecnologjie.
A PUARTADE DI MAN_ Se po si pense che il dut al è stât realizât cuntun budget ridot, al fâs rifleti no pôc su lis potenzialitâts chescj imprescj a permetin: al è bastât un pc, une webcam, un microfon, un colegament Internet e la trasmission e je lade in onde. «Par noaltris al è stât sempliç parcè che o vin di ringraziâ sedi i gjestôrs de Ostarie A le Patrie dal Friûl che nus àn dade la sale che e je deventade il nestre studi “webtelevisîf” e la TradinvestTV che nus à metût a disposizion la tecnologjie dal “canâl” pe trasmission» a comentin de redazion de riviste.
Sul inprin o ai pensât che chest al fos un splendit câs isolât di ûs de tecnologjie par rifleti su la nestre identitât e sul nestri avignî, ma no je cussì! Pai letôrs de rubriche “Furlans digjitait furlan” nol sarà dificil cjatâ altris esemplis in Rêt.
LA PRIME VOLTE_ Il prin câs di fusion tra tecnologjie e culture locâl che o ai viodût al è stât cuant che o fasevi lis superiôrs e un student al è rivât a gambiâ la imagjin che e vignive fûr cuant che si veve di sierâ i computers: la scrite par talian “ora è possibile spegnere il computer” al veve rivât a fâle deventâ “cumò tu puedis distudâmi”.
Sino deventâts un Friûl tecnologjic? La rispueste no je semplice, ma la tecnologjie e la bande largje nus compagnin viers l’anulament des distancis.
Marco Amato