CULTURE – Musiche di int uniche

Musiche di gente unica-Musiche di int uniche al è un progjet inmaneât de Associazion Culturâl ReddArmy cul contribût dal Servizi Identitât Linguistiche de Regjon e in colaborazion cul Comun di Udin. Tal specific si trate di une iniziative che si compon di trê azions: un workshop/taule taronde cun trê esponents de atuâl sene musicâl furlane (Gigi Maieron, Leo Virgili, Dek Ill Ceesa), doi concierts (il stes Maieron e il feroç trio rock dai Pantan) e un concors viert a grups e musiciscj cu la pussibilitât, pal vincidôr, di sunâ inte suaze di un conciert di Arbe Garbe e Carnicats. Ma par sclarîsi mior rispiet a obietifs e vivarositat di Musiche Uniche o vin scambiat cuatri peraulis cun Fulvio Romanin, fondator di ReddArmy, scritor e musicist.
Cuale ise stade la premesse o il spirt che us a puartâts a creâ cheste manifestazion? E cuâi sono i obietîfs che si jeris metûts?
«Cheste manifestazion e nas par inserîsi intun contest za fuart, chel che al à viodût Musiche Furlane Fuarte e Suns intivâ la musiche par furlan, e zontâsi intun circul virtuôs za presint sul teritori. Come Reddarmy o nassin di une cueste di Radio Onde Furlane, e o vin trê vincidôrs dal Premi Friûl (Reddkaa, Dek Ill Ceesa, Dj Tubet) tal nestri roster. Nus è someat just tornâ a dâ a chê culture che tant nus à dât».
Il nom che o vês sielt al puarte inevitabilmentri al vecjo slogan peât ae Regjon: parcè Musiche Uniche?
«O volevin dâ un segnâl di continuitât e di colegament al preesistent, nus è someat impuartant valorizâ la unicitât e lis peculiaritâts de nestre culture».
Cuale ise, secont te, la atuâl condizion de musiche furlane a nivel di sene, grups, atenzion di bande de stampe e dai adets ai lavôrs?
«Buine ma no otime. Si sint un pêl inmò di complès di inferioritât, di ‘musiche par dialet’». Ma la musiche furlane – come dute la culture – e à dimostrât di podâ lâ a cjâf alt no dome in Italie ma par dut il mont; par vê pôre dal judizi di un public talian, o vin trascurât un public forest: mâl; se no pensarìn fûr dai confins, no deventarìn mai lenghe fuarte».
Cuâl pensistu che al podarè jessi il contribût di Musiche Uniche a pro di cheste sene?
«Incressi il volan di interès e di credibilitât dai progjets culturâi linguistics soredut intun public zovin, e creâ un laboratori ‘permanent’ su Internet dulà tignî vîf e fuart il patrimoni creatîf furlan in divignî.»
E proprit a proposit di Internet o segnalìn il sît de otime ReddArmy, www.reddarmy.com, e chel dal progjet www.musicheuniche.eu, dulà che si pues discjamâ il bant par partecipâ ae iniziative.
Mojra Bearzot